Atualità
19 dezëmber: prejentazion dl romann nuef dl cuncors Autores Ladins scrij
USP – Ivan Senoner ova pra l cuncors provinziel de leteratura ladina venciù n pest straurdiner: si romann ie unì valutà tan bën dala cumiscion che l ie pona unì publicà te n liber a pert. N mierculdi ai 19 de dezëmber unirà chësc liber nuef, che trata de n romann scrit per jëuni, prejentà tl zënter per jëuni a Urtijëi. L assessëur Florian Mussner rujenerà dl valor de chësc liber per la mendranza ladina y Judith Piccolruaz cumpanierà la sëira de leteratura al tlavir.
L liber nuef trata de n romann criminel dal titul “L fova n iede te Gherdëina. Na saga de cater families tres trëi generazions”. Ivan Senoner de Fuldé à scrit de cater families y si storia ntravaieda tres trëi generazions: Tl zënter dla storia ie l jëunn Artur che ti va do ala fusties de si passà y ruva sëura che l judier che vivova pra si nëine ne n’ ie nia mort de na mort naturela. L mët dut si mpëni per nrescì la storia da dumbries de si antenac y scuvrì l’urità. Te si romann criminel toca l autor la tematica dla opzions na tematica mo puech refleteda culetivamënter te nosc raions.
Sciche damandà tl cuncors de leteratura scrit ora dal Assessorat provinziel ladin, trata l pez de curaje zevil. L ie na storia penseda per jëuni che fej pensé do sun l vester na bona persona y na persona rëidla, sun la nfluenza di antenac y de cie che uni un fej nstës. L roman conta che l curaje zevil ne n’ie nia n merit, ma dantaldut na respunsabltà ruënta che ie suënz nia saurida da tò tla mans.
La sëira de leteratura ai 19 de dezëmber ie nce la premiazion dla segonda pert dl cuncors Autores Ladins scrij. L prim liber de chësta edizion dl cuncors, cun stories per jëuni de sies autores fova bele unì prejentà ala fin de mei (N liber nuef de stories per jëuni, scrit da autores ladins). Per l cuiertl dl liber fovel unì scrit ora n segondo cuncors. La grafica de Petra Polli fova unida valuteda la plu passenënta per l liber de Ivan Senoner.
Pra la prejentazion dl liber nuef puderan nce audì l assessëur Florian Mussner, l diretëur dla repartizion Cultura Ladina Alexander Prinoth y l presidënt de cumiscion Marco Forni. L’atmusfera dl romann criminel unirà sorisseda al tlavir da Judith Piccolruaz.
Duc i nteressei ie nviei dala 20.30 tl local Saut tl zënter per jëuni a Urtijëi.
---
I culaburadëures di media ladins ie nviei a chësta sëira de leteratura y de nfurmé la populazion dla scumenciadiva culturela.
as
Galaria dales fotografies
