Atualità
Materies dl ejam de matura 2013 tla scoles ladines
USP – La materies che unirà damandedes tla segonda prova scrita dl’ejam de stat ie unides seguredes. Tla trëi sezions defrëntes dla scoles autes ladines se tratela de economia aziendela, rujenedes fulestieres y proietazion. La Ntendënza ladina a una cun l Minister dl Istruzion a Roma à nce fat ora ciuna materies che vën damandedes ora a usc dai cumëmbri dla cumiscion che vën da d’autra scoles.
Tla segonda prova scrita dl ejam de matura uniral ti Istituc per l cumerz a Urtijëi y La Ila, per la sezion per l cumerz IGEA, damandà la materia de economia aziendela. Tla sezion turistica y de rujeneda dla scola auta Raetia a Urtijëi messerà i candidac dé ju na prova scrita de rujeneda fulestiera. Tl Lizeum d’ert a Urtijëi vel chëst ann la proietazion per la segonda prova scrita.
Cumëmbri dla cumiscion che vën da d’autra scoles puderà ti Istituc per l cumerz a Urtijëi y La Ila per la sezion de cumerz IGEA, damandé i sculeies do economia aziendela, nglëisc y conc. Per la sezion turistica y de rujeneda puderal unì damandà de talian, tudësch, conc y nfurmatica. Tl ejam de matura tl Lizeum d’Ert puderà i cumisseres externes damandé de talian, tudësch, conc y fisica.
Tla scoles autes paritetiches ladines possa i candidac tla prima prova scrita crì ora danter tudësch y talian. La terza prova scrita ie metuda adum da doi pertes: n iede vëniel damandà cunescënzes te chëla rujeneda che ne ie nia unida crissa ora per l prim di, y tla segonda pert muessa i maduranc respuender a na prova multidisziplinera che reverda de plu materies.
L ejam de maduranza scumencerà chëst ann ai 19 de juni cun la prima prova scrita.
as
