Atualità
Assessëur Mussner: tenion cont de nosta rujeneda dl’oma
USP - Da pert dl UNESCO ie l 21 de fauré unì numinà “Di nternaziunel dla rujeneda dl’oma”. Per chësta ucajion nvieia l assessëur provinziel ladin Florian Mussner de tenì cont de nosta rujeneda dl’oma te duc i ciamps dla vita da uni di: “Nosta rujeneda dl cuer ie n sëni de identità, che dasson nce mustré. Plu che l adurvon y plu saurì che se fajon nce a rujené nosta rujeneda te cuestions plu modernes”.
La fundamënta de nosta mendranza culturela ie dantaprima la rujeneda, perchël nvieia l reprejentant ladin tla Jonta provinziela iust per l di nternaziunel dla rujeneda dl oma, de dé mo plu arta a nosta rujeneda ladina. Acioche la grupa de rujeneda ladina giate mo plu recunescimënt ufiziel a livel politich y scientifich, muessela nce aduruvé plu y plu si rujeneda. "A livel culturel sciche tla leteratura o tla mujiga vëniel bele adurvà truep nosta rujeneda dl'oma. Plu che l adurvon tla vita da uni di y plu saurì che se fajon nce al adurvé per ciamps plu modernes" sorissea Florian Mussner.
L assessëur provinziel ladin lauda te chësta ucajion duc chëi che se da ju y porta inant la rujeneda ladina. "Dlongia la istituzions, iel dantaprima i media ladins che juda pro acioche se fajon for plu la urëdla nce per esprescions nueves. Ajache propi cun l aiut de esprescions nueves se svilupea la rujeneda a na maniera de pudëi l adurvé for de plu nce per tematiches de atualità" sorissea l assessëur.
as
