Atualità
Capitela dla cultura 2019: ancunteda cun Unieja y pona candidatura de Bulsan
USP – Do che Unieja semea de ulëi lascé tumé la candidatura dl Nordest dla Talia per deventé Capitela culturela europea 2019, à l presidënt dla Provinzia Durnwalder (NCUEI) ai 08 de auril dit che dan crì d’autra pusciblteies iel mo da se la fé ora cun Unieja.
Cun na lëtra al presidënt dla Provinzia de Bulsan, à l ambolt de Unieja Giorgio Orsoni nvià a n'ancunteda per rujené dl jì inant dla candidatura per la capitela culturela europea 2019. Sota l inuem de Nordest dla Talia se ova la Provinzia de Bulsan metù adum cun l Trentin, l Veneto, l Friul y la zità de Unieja per purté inant la candidatura deberieda. Chësta culaburazion ie śën manaceda dala valutazion de Unieja de zapé ora dla candidatura. "Unieja à na posizion zentrela dla candidatura, y sce iusta ëila zapa ora, devëntela bëndebò strënta" à dit Durnwalder do la senteda dla Jonta.
La documentazion de candidatura muessa unì data ju nchin de setëmber, perchël ne restel nia scialdi tëmp sce Unieja ëssa propi da zapé ora. "L muessa vester na zità danora, y sce nia Unieja, pona pudëssel vester Bulsan o una dl Südtirol. Na candidatura dl'Euregio ne va nia, ma na zità cun l raion ntëurvia fossa bën realistich" à dit Durnwalder. Aldò dl presidënt dla Provinzia ëssa l Trentin nteres a na tel culaburazion, a Dispruch iel mo n pue' da udëi.
Durnwalder à sorissà che na candidatura ne adrova nia de gran nvestizions. "Südtirol à ti ultimi ani bele abù nvestizions tl ciamp culturel, mustran su proiec nviei via deberieda cun ciamps soziei y economics. On na vela de museums che vën nvidieda, on strutures sciche l furtin de Furtëza, l'arpejon mundiela Dolomites y son tl lëur de nes posizioné sciche Green Region. Tl cajo de na candidatura se tratëssela de culeghé y prejenté cuntenuc y strutures che on bel.
as
