Atualità
Mussner tl Istitut Ladin per udëi l lëur de svilup linguistich
Acioche la rujeneda ladina posse se mantenì tl cuntest plurilinguistich y tenì l var di tëmps muessela unì svilupeda inant. Sun ncëria dla Provinzia de Bulsan lëura l Istitut culturel Ladin Micurà de Rü te chësc ciamp tan mpurtant per la rujeneda de mendranza. Cun na vijita tla sënta de Sëlva se à l assessëur ladin Florian Mussner fat n cheder de co che va inant i lëures.
Tl ciamp spezifich dla rujeneda vëniel tl Istitut Ladin te chësc mumënt laurà cun gran dedizion a doi proiec: l dizioner talian-gherdëina y l svilup dla rujeneda cun paroles nueves. L dizioner che fajerà da culegamënt danter l talian y l gherdëina ie de gran utl a fé plu saurì tl scrit. "Tl cuntest plurilinguistich di luesc ladins ie la jënt plu useda a rujené ladin y manco a scrì. L dizioner che unirà ora mo chëst ann sarà n strumënt de gran utl per se fé plu saurì a scrì ladin" à dit l assessëur ladin Mussner do la vijita te Sëlva.
Te na grupa de lëur vëniel deberieda cun espertes dl Ufize provinziel per cuestions linguistiches laurà ora prupostes per l svilup dla rujeneda ladina. Tò su paroles nueves ie na cuestion zitia che se damanda dl'aurela. La grupa de lëur porta ite prupostes per esprescions nueves y manieres de di, che possa do n tëmp de sperimentazion pona unì tëutes su ufizialmënter ti vocabuleres. "Acioche la rujeneda ladina ne reste nia fërma ie l lëur sun i neologisms de mpurtanza vitela" spiega Marco Forni, espert linguistich dl Istitut. L lëur de svilupé prupostes de paroles nueves vën fat per l gherdëina y l badiot deberieda. "Me fej gran plajëi che l vën cris soluzions che vede bën per tramedoi valedes ladines dla provinzia de Bulsan" dij l assessëur Florian Mussner, che se mbincia che chësc lëur vënie prësc nce slargià ora al'autra valedes ladines dla Dolomites. "Te chëla che l unirà svilupà esprescions nueves che vede bën per de plu valedes ladines, puderà la rujeneda ladina n puech al iede nce crëscer y tenì l var di tëmps" sorissea Mussner. La streda de chësc vieres ie mo longia, perchël ti dà la Jonta provinziela gran mpurtanza al lëur linguistich che vën fat tla istituzions ladines. (USP)
as
