Atualità
App de 7 stories te 4 lingac: presentaziun ai 10 de mà a La Ila
Imparè lingac a na manira saurida y plajora: la publicaziun 7 stories te 4 lingac é śëgn inće da ciafè tla forma digitala por fonins. L’aplicaziun interativa nöia dal inom “Storiesapp” dl ofize Inovaziun y Consulënza dla Intendënza Ladina gnarà presentada en vëndres, ai 10 de mà dales trëi domisdé a La Ila.
Lu, Paur, Pinsiers, Barbolo, Simeli, Desert, Crazacil: insciö à inom les 7 stories che é śëgn inće da ciafè tla forma de apps didatiches interatives por iPhone, iPad y iPod Touch. L'ofize Inovaziun y Consulënza à surantut les cunties, les imajes, i tesć y les usc dal cd-rom (che ê bele gnü dè fora deboriada cun le liber) y à deboriada cun sü partner tecnics svilupé la app. A chësta manira röia les cunties fora por döt le monn sciöche proiet multimedial d'educaziun linguistica integrada. Chësc porta inće pro a fà conësce le lingaz ladin, che se profilëia y se mostra a per di atri lingac a livel mondial. "La forma digitala nöia por imparè a conësce les stories pîta inće l'ocajiun da baratè da n lingaz al ater y a chësta manira po les mitans y i mituns imparè i lingac a na manira saurida y plajora" sotrissëia l‘assessur ladin Florian Mussner.
Vigni cuntia é da aldì te 4 lingac: tl ladin dla Val Badia, tl ladin de Gherdëna, tl talian, tl todësch y tl inglesc. Laprò él inće la poscibilité da imparè parores nöies che vëgn dant tles scenes dles stories.
A tröc mituns y mitans ti sal dër bel da se dè jö cun cunties, lingac, mesi desvalis y rapresentaziuns grafiches. Stories é śëgn deventè n stromënt interatif che dà la poscibilité da lì y ascutè sö, mo inće da „aziché" les cunties. Al basta druché na tasta por passè da na scena al'atra y da n lingaz al ater. "Deache les ilustraziuns é animades, devënta les cunties plü emozionantes y tl medemo tëmp educatives" spliga l'intendënt Roland Verra.
Storiesapp é adatè por mituns y mitans, dala scolina ala scora elementara y dla scora mesana por l'insegnamënt integrè di lingac.
Les apps pon desćiarié debann sön iPad, iPone y iPodtouch. De plü informaziuns sön le download é da ciafè sön le sit www.pedagogich.it.
Les app gnarà presentades ai 10 de mà dales 15:00 tla „Ćiasa de Cultura" a La Ila. Tlo gnaràl inće metü sö de plü staziuns por porvè fora diretamënter l'aplicaziun nöia.
Sön le valur de chësc proiet baiarà l‘assessur ladin Florian Mussner y l‘intendënt Roland Verra. Le proiet gnarà presentè da Gretl Senoner, dl Sorvisc de educaziun linguistica integrada y da Felix Ploner, coordinadù dl proiet, che se dà jö cun les tecnologies nöies tla scora ladina.
Ala presentaziun é inviades dötes les insegnantes y düć i insegnanć dla scolina y dla scora elementara y inće i geniturs de mituns y mitans danter i 0 y 14 agn.
Te chësta ocajiun podarà l'ispeturia dles scolines ladines Edith Ploner pié dô por vigni scolina n iPad da pert dla Fondaziun Cassa dl Sparagn, che sostëgn insciö la promoziun dl'inovaziun te scora y te scolina. (USP)
---
I colaboradus di media é invià ala presentaziun y a lascè alsavëi i contignüs de chësta inovaziun didatica.
as
Galaria dales fotografies
