Atualità
Jonta provinziela trata la cunescënza dla rujeneda de nseniamënt
La Jonta provinziela uel mëter a jì che duc i sculeies sebe la rujenedes a na maniera da pudëi ntënder l nseniamënt te scola. Aldò dl presidënt dla Provinzia ne vëniel a chësta maniera nia me segurà l livel dl nseniamënt, nsci iel nce puscibl arjonjer na miëur ntegrazion di sculeies imigrei. La Jonta provinziela à (NCUEI) ai prim de lugio tratà de plu modiei per ti jì permez a chësta problematica.
La puscibltà de pudëi jì a scola ie nce per i sculeies imigrei n dërt. "La situazion devënta problematica sce i sculeies ne cunësc nia la rujeneda y ne ie nia boni de ntënder la lezions" à dit l presidënt Durnwalder ncuei do la senteda dla Jonta provinziela. Sce l fossa me caji singuli, pona fossel nce realistich pensé a na ntegrazion per chëi che ie d'autra rujeneda dl'oma. Ma sce i sculeies che ne sa nia tudësch o talian ie nchin a n terzo, o nchinamei mesa la tlas, "pona resieia duta la tlas de l sentì, ajache l nseniamënt de scola devënta pona dantaprima me nseniamënt de rujeneda" à dit Durnwalder.
Per ti jì permez a chësc problem, à la Jonta provinziela tratà de plu modiei per miuré la cunescënza dla rujeneda di sculeies imigrei. "A chësta maniera pudons da una pert seguré l livel de nseniamënt a scola, y dal'autra pert ie l savëi dla rujeneda na cundizion per fé garaté la ntegrazion" à dit l presidënt dla Provinzia sorissan che me sce l vën pità pusciblteies de mparé rujenedes, possel nce unì garantì l dërt de crì ora la scola.
Per avëi n cheder ntier dla realtà, ie la Jonta provinziela stata a una de audì i cuordinadëures di zëntri de rujeneda. "Ulon mparé a cunëscer si esperiënzes y deberieda cun ëi analisé la stredes che n pudëssa tò" à dit Durnwalder. La senteda deberieda ie ududa dant te n doi enes, ai 15 de lugio. (USP)
as
