Atualità
La Trienala Ladina y pest de scoltöra Agreiter coliëia les diversitês
La Trienala Ladina – mostra d’ert coletiva ladina importanta - y le Pest artistich de scoltöra Richard Agreiter 2013 é gnüs presentà incö, ai 17 de lugio, te na conferënza stampa a Balsan cun la partezipaziun dl assessur Mussner. Le titul dl'ediziun de chësc ann, curada da Alfredo Cramerotti, é "Caos y Ordinn". Le Pest Agreiter ti va al artist Andreas Zingerle.
"Caos y Ordinn" é le titul dla Trienala Ladina, mostra d’ert contemporana 2013, che é rovada ala cuarta ediziun y che gnarà daurida en vëndres, ai 19 de lugio tl Museum Ladin Ćiastel de Tor a San Martin de Tor canche al gnarà inće surandè le Pest artistich de scoltöra Richard Agreiter.
Tartan la conferënza stampa à l'assessur Mussner sotrissé l'importanza dla Trienala, ajache ara coliëia les diversitês culturales y linguistiches y liëia chëstes tematiches cun na capazité inteletuala zënza desfarenzié danter ëi y ëres.
Le binom caos y ordinn che comana y ademplësc a na moda ambivalënta düć i sistems dla sozieté te chëra che i viun - dal'economia ala tecnologia, dal ambiënt ala cultura, dales chestiuns de gëne a chëres d’identité - rapresentëia porchël le leitmotiv particolar dla Trienala 2013. Ordinn y caos, artifizial y natural, local y global: espresciuns che pê en contrast, che vëgn dant tl alestimënt dl Museum Ladin curè da Alfredo Cramerotti (dirigënt de n zënter d’ert important, le "Mostyn" tl Gales) che à baié dala conferënza stampa de dui conzeć che ne n’é a vigni moda nia en contraposiziun, mo che é lià da na relaziun reziproca olache un ne anulëia nia l'ater: tla conferënza stampa àl dit "Al é sté n tru che é pié ia da chisc binoms che se integrëia y é ambivalënć, dui conzeć desvalis por lì le medemo fenomenn.”
Chësc binom, chësta ambivalënza vëgn rapresentà dales operes di sis artisć che Cramerotti à chirì fora adöm cun na iuria internazionala danter 34 candidać: ara se trata de Flurina Badel (CH), Julia Biasi (I/USA), Fabian Feichter (I), Manuel Riz (I), Martina Stufflesser (I) y Alesch Vital (CH). La Trienala Ladina é na mostra d'ert coletiva. Ara é gnüda metüda sö por valorisé y promöie la produziun d'ert ladina y se referësc a artisć che vir tla Val Badia, te Gherdëna, te Fascia, te Fodom y Ampëz, ti Grijuns y tl Friul, o che à n lian particolar cun la storia, la cultura y les tradiziuns de chisc raiuns.
La Trienala Ladina sarà da odëi debann tl Museum Ladin Ćiastel de Tor a San Martin de Tor ćina ai 31 d’otober dl 2013.
Paralelamënter metarà le museum fora inće l'opera che à davagné, danter 29 candidates y candidać, la terza ediziun dl Pest artistich de scoltöra Richard Agreiter: la scoltöra particolara de petun dl artist che vir y laôra a Perca Andreas Zingerle.
Le pest sostignì dal artist austriach d’origina ladina Richard Agreiter, da chël che al tol l’inom, é preodü por sculturs che laôra y vir normalmënter ti raiuns dl vedl Tirol y prevëiga n pest de 10.000 euro.
La Trienala Ladina y le Pest artistich de scoltöra Richard Agreiter 2013 é gnüs presentà incö, ai 17 de lugio 2013, tartan na conferënza stampa a Balsan dal assessur provinzial por la Cultura ladina Florian Mussner, dal diretur dl Museum Ladin Stefan Planker, da Richard Agreiter, scultur y promotur dl pest dal medemo inom, y da Alfredo Cramerotti, curadù dla Trienala 2013.
L'inauguraziun dla mostra y la surandada dl pest de scoltöra (y l'esposiziun dl'opera che à davagné) é en vëndres ai 19 de lugio dl 2013, dales 18, tl Museum Ladin Ćiastel de Tor, tla strada Tor 65 a San Martin de Tor.
usp
Galaria dales fotografies
