Atualità
Di dla Cultura Ladina ai 20 de setëmber dedicà a jëuni
L Assessorat provinziel Ladin dedichea l 20 de setëmber al raport jëuni - cultura y trata chësc argumënt tl tradiziunel “Di dla Cultura Ladina”. Tl palaz Widmann a Bulsan uniral deberieda cun l presidënt dla Provinzia Durnwalder y l assessëur Mussner jit do ala dumanda co che la cultura muev i jëuni y co che i jëuni muev la cultura. Te n referat uniral tratà i jëuni y l mond di social network.
L "Di dla Cultura Ladina" se prejënta chëst ann cun na vëta plu jëuna: l scumencierà dala trëi domesdì y mpede truepa rujenedes, uelen ti dé plu lerch ai jëuni nstësc, da udëi sun n video y pona pra na mëisa de descuscion.
Do la ntroduzions dl presidënt dla Provinzia Luis Durnwalder, dl assessëur ladin Florian Mussner y dl diretëur de repartizion Alexander Prinoth uniral riesc mustrà n film curt. Te chësta produzion de Elisabeth Kostner, Martin Dejori y Alex Walpoth, puderan udëi jëuni che porta dant si ponc de ududa sun cie che la cultura ie per i jëuni y l raport danter cultura y i social network.
Al argumënt di jëuni tl mond di social network ti jirà Patrick Stuflesser plu sot, mustran danterauter nce su cie che suzed cun la nfurmazions che vën dates inant te chësta rëies de cuntac.
L domesdì metù a jì dal Ufize provinziel Cultura Ladina finerà via cun na mëisa de descuscion che traterà tan cuntënc che i jëuni ie cun la vela de cultura che ti vën piteda y tant che i se nuzea nce la prupostes che ti vën pitedes. Te chësc cuntest uniral nce rujenà dl raport di jëuni cun i social media.
Pra la mëisa de descuscion rujenerà Wilma Runggaldier dl Ufize provinziel per i jëuni, Verena Obojes dl Sorvisc ai Jogn Val Badia, Gabriel Stuffer de Nëus Jëuni Gherdëina y Jaime Venturini dla Consulta provinziala di jëuni. La muderazion unirà meneda da Elisabeth Kostner. Per l publich d'autra rujenedes uniral pità na traduzion simultanea.
---
Culaburadëures di media ie nviei a cunedì l "Di dla Cultura Ladina" y de tò pert ala manifestazion
n vënderdi 20 de setëmber
dala 15.00
tl palaz provinziel Widmann
plaza Magnago, a Bulsan.
as
