Atualità
Trasmiscions de TV-ladina śën da udëi tres internet (cun AUDIO)
Produzions de televijion per ladin finanziedes dala Provinzia da udëi per duc: chësta puscibltà vën śën data tres internet sun l canal Youtube dla Provinzia de Bulsan (www.youtube.com/ProvinziaBulsan). La plataforma video à aldò dl assessëur Mussner doi fins primeres: “Tres la plataforma nueva vëniel mustrà su la mendranza ladina sun n canal nternaziunel y pità trasparënza sun proiec finanziei dala Provinzia”.
La produzions de televijion à na gran mpurtanza per la mendranza ladina ajache les prejënta si particulariteies da udëi y scuté su a na maniera drët da plajëi. Ert y cultura, economia, scola, soziel ma nce vel fiction prejënta cie che ie veramënter la mendranza ladina y co che vif la jënt ladina. Chisc cuntenuc che ie bele unic laurei su te truepa produzions televijives vën śën lascedes udëi a mo n majer publich. "La plataforma sun internet pieta n servisc a nosta jënt, ma nce a nteressei de autra cultures che uel mparé a cunëscer miec nosta grupa de rujeneda" nsci l assessëur ladin Florian Mussner. Na sauridanza iel nce per l nseniamënt de scola ajache nsenianc ne à sën nia plu de bujën de mpresté ora DVD's per mustré vel trasmiscion ladina.
Sun la plates www.youtube.com/ProvinziaBulsan possen śën n iede udëi de plu trasmiscions dla lingia "Scenar", "Euro TV" y "Deboriada". Do y do uniral nce publicà trasmiscions la lingia "Nosta scola", "Horizont" y mo d'autra produzions singules.
L segondo fin dla plataforma nueva ie chël de pité mo plu trasparënza da pert dla Provinzia de Bulsan. "La produzions che publicon tres internet ie unides finanziedes dal 55 al 90 percënt dala Provinzia de Bulsan" spiega l assessëur Mussner. Me da pert dla Repartizion Cultura y Ntendënza ladina iel tl 2012 unì finanzià produzions de televijion ladina cun de ndut 47.706 euro.
L proiet de pité video per ladin tres internet, nuzan a chësta maniera la pusciblteies di media nueves y, te na maniera particulera chël di social media, ie unì metù a jì dal Servisc de comunicazion cun l sustëni dl Ufize Cultura Ladina. (USP)
as
Galaria dales fotografies
Assessëur Mussner n cont dla plataforma de TV-ladina
- Scarica il file audio 415 kb
