Atualità
La junëza à muet l Di dla Cultura ladina
La vita culturela che tën su la mendranza ladina y la ulentà de vester ladins possa me jì inant, sce nce nce la junëza va chësta streda: chësc ie stat l pensier zentrel che à giaurì l Di dla Cultura Ladina (NCUEI DOMESDI) ai 20 de setëmber tl palaz Widmann a Bulsan. Ntan chësc domesdì ie respunsabli istituzionei y truep jëuni jic plu sot ala tematica dl raport danter jëuni y cultura. Te chësc cuntest iel nce unì tratà i jëuni tl mond di social networks.
La junëza ie suvënz plu davierta a nuviteies y a les purvé ora. Ntan l Di dla Cultura ladina, à l Assessorat provinziel ladin propi ulù ti jì plu sot a la manieres jëunes y nueves de viver la cultura. Se tenian al moto dl domesdì tematich "La cultura muev la junëza - La junëza muev la cultura" se à respunsabli istituzionei y i jëuni baratà ora n cont ce co che l vën vissù la cultura y cie che i jëuni se adrova.
"La cultura ie la basa da chëla che dut pea via: dala maniera de identificazion al svilup", à metù a cuer l Assessëur provinziel ladin fajan nce referimënt la basa culturela per dé inant valores. Per pudëi dé inant la cultura uelel vester l nteres dla jënt, l sustëni de truepa lies ulenteres, ma nce chël dla istituzions. "Perchël se adrova la mendranza ladina nce strutures, sciche l Istitut Ladin o la scoles" à dit l Assessëur.
I jëuni ie mo plu che d'autri, a cunfront danter l purté inant si cultura de cësa y l fé pert de na globalisazion. Cie che ie veramënter i social networks y l raport di jëuni cun chësta pusciblteies nueves dla comunicazion mundiela à Partick Stuflesser purtà dant te n referat. Tl adurvé i social networks uelel vester cumpetënza aldò, l ie mpurtant che n se rënde cont ulà che ruva la nfurmazions che n dà ite y co che chëstes possa unì nuzedes da d'autri. Perchël ie de bujën de savëi n nëut n cont de facebook, twitter, google y autri, per se nuzé dla pusciblteies, zënza nstës se lascé nuzé dai social networks.
Cie che la cultura ie per i jëuni dla valedes ladins ie unì purtà dant te n film curt metù adum da Elisabeth Kostner, Martin Dejori y Alex Walpoth. Chësc ie pona nce stat la basa per na descuscion cun jënt che lëura tl ciamp dla junëza y l publich.
L Di dla Cultura Ladina à pità truepa ideies nueves acioche i jëuni possa viver mo miec la cultura y co che nce i manco jëuni possa fé si pert. "L Di dla Cultura Ladina ie na scumenciadiva mpurtanta acioche la jënt ladina se lasce nce audì ora dla valedes" à metù a cuer l Presidënt dla Provinzia te si salut. L fin zentrel da chëst ann ie stat de baraté ideies y mutivé no me a mantenì la cultura ladina, ma a ti dé forma a mudazions y a co se adaté ai tëmps. (USP)
as
