Atualità
Prejentazion dla gramatica paredleda dl ladin, talian y tudësch
USP - N lunesc, ai 18 de nuvëmber, uniral prejentà tl'Università a Persenon la terza pert dla Gramatica paredleda dl ladin, talian y tudësch che reverda la frasa scëmpla. La prejentazion unirà fata dai autëures Peter Gallmann, Heidi Siller Runggaldier y Horst Sitta.
L ciamp Inovazion y consulënza tl Departimënt Educazion y cultura ladina se tol dant de dé ora sot al prugram "Lingac a cunfront" na gramatica che paredlea i trëi lingac de nosta Provinzia. L liber che reverda la frasa scëmpla ie l terzo de na lingia che dëssa curì do y do duc i ciamps plu mpurtanc dla gramatica. Chësc lëur vën purtà inant dai prufessëures Peter Gallmann, Heidi Siller Runggaldier y Horst Sitta cun l sustëni de Giovanni Mischi y Marco Forni per la pert ladina. L lingaz de spligazion dla gramatica ie tudësch, ma i fenomenns gramaticai vën splighei al medemo livel te duta trëi la rujenedes. La carateristiches di trëi lingac ne vën nia tratedes ndolauter, ma vën metudes una dlongia l'autra per pudëi les cunfrunté miec.
La gramatica ie penseda dant al dut per nsenianc y per studënc che uel deventé maestri, ma la sarà nce vester de utl per duc chëi che se nteressea di lingac y dant al dut de chëi che vën rujenei te nosta Provinzia.
I culaburadëures di media ie nviei ala prejentazion dla gramatica paredleda dl ladin, talian y tudësch che reverda la frasa scëmpla
n lunesc, ai 18 de nuvëmber,
dala 16.00 domesdi
tl salamënt
dl Zënter de documentazion dla storia dla scola
tla "Cësa dla miscion"
dla Facultà de Scienzes dla Furmazion
a Persenon.
usp
