Atualità
Di dla porta davierta tla scoles artistiches a Urtijëi
USP - L Lizeum d'Ert y la Scola Prufesciunela per l Artejanat Artistich “Cademia” de Urtijëi se prejënta n vënderdi, ai 7 de fauré cun l Di dla porta davierta, chëst ann sot al tema Cambiamenti/Veränderungen/Mudamënc. N previjion de chësc evënt saràl n'ena di progec pra chëla che la sculées y i sculeies puderà fé pea ntan duta l'ena pra lauratueres.
La jëunes y i jëuni laurerà deberieda cun cumpanies de d'autra tlasses, y uni lauratuere unirà menà da nsenianc de materies teoriches y pratiches. I lauratueres uel vester na pruposta auternativa al'atività didatica normala; nsci che studënc y dozënc laurerà deberieda per realisé prudoc artistics mirei ala sperimentazion de espressions artistiches nueves.
L unirà pità n lauratuere per fé adum libri artisticamënter, pra chël che l unirà metù adum libri lauràn cun plu materiai; n lauratuere de bodypainting, pra chël che n puderà lascé ora duta si creatività. L School Magazine documenterà, tres fotografies y articuli jurnalistics, l'atività fata ntan duta l'ena. Ambic artistics nueves puderà unì scuvierc tres l lauratuere scenografich, pra chël che l unirà fat modiei scenografics se basan sun pièce teatreles o opres d'ert. La tecnica dl batik sarà l'ucajion per realisé vel' pez de guant persunalisà y da fantajia. L lauratuere de nterpretazion artistica dajerà l mesun de nterpreté l tema Cambiamenti/Veränderungen/Mudamënc se muvan danter nstalazion y perfomance. Chi che uel puderà "lascé si sëni" de gra al lauratuere de nzijion. Sot al moto "Nëus meton su na firma" uelen ti dé la puscibeltà ala sculées y ai sculeies de vester mprendidëures per n'ena. L lauratuere de cosmetica mustrerà coche n crieiea prudoc de belëza da uni di, coche cremes per mus y corp ma nce jiefes. Per ultim, de gra al seminar de striunëc, se trasfurmerà la scola te na Hogwarts, ulache striunaries y ncantejims sarà i prutagonisć.
Na menzion ezeziunela se merita l spetacul teatrel "Tristan & Isota", urganisà dal Lizeum d'Ert "Cademia" de Urtijëi deberieda cun l Lizeum Ladin di Lingac de Poza de Fascia. Chësc sarà da udëi n merdi, ai 4 de fauré dala 20.30 a Poza te Fascia y n juebia, ai 6 de fauré dala 20.30 a Urtijëi. L proget, che ie na cooperazion danter istituc dla valedes ladines, à abù coche resutat na sperimentazion teatrela plurilinguela: n se à nuzà dl ladin de Gherdëina, de Fascia y dla Val Badia coche nce dl talian y dl tudësch. La reinterpretazion dl mit de Tristan y Isolde, ambientà tla valedes ladines de Fascia, Gherdëina y Badia, ie n esperimënt linguistich y artistich, davia che la jëunes y i jëuni à njenià lumes y audio, fat n video, scenografies y guanc, ti dajan vita a n drë spetacul.
La pruposta culturela tan rica dl'ena di progec uel fé cunëscer i aspec inovatifs dl Lizeum d'Ert y dla Scola Prufesciunela "Cademia", ti giaurian la porta y i ujes a duc i curiëusc y nteressei n vënderdi, ai 7 de fauré n ucajion dl Di dla porta davierta.
SAN
