Atualità
L’assessur Mussner sön le Dé internazional dl lingaz dla uma: “I messun ćiarè dl lingaz ladin”
USP - Le Dé internazional dl lingaz dla uma da incö, ai 21 de forà rovënn nosta atenziun sön i lingac de mendranza. “Propi nos ladins sciöche mendranza messun ćiarè de nosc lingaz ladin por suravire” à dit l’assessur ladin Florian Mussner. “Nosc lingaz dla uma n’é nia ma n meso de comunicaziun, mo bëgn inće espresciun de nosta cultura” à alzè fora Mussner.
Propi deache le lingaz ladin vëgn ma plü baié da püćes porsones él particolarmënter de valüta sciöche lingaz dla uma, à dit l'assessur Mussner. "N lingaz che ne vëgn nia dè inant ala generaziun che vëgn do, vëgn desmentié y cun chësc sambëgn inće la cultura che toca laprò", spliga l'assessur. "Porchël messunse ćiarè de nosc lingaz ladin y ćiarè da l'adorè le plü ch'ara va" àl alzè fora. L'assessur Mussner se tol a dì che le lingaz dla uma de n pice grup etnich à inće dagnora debojëgn dl sostëgn publich tres scomenciadies de svilup por ći che reverda la scora y la cultura y impormët da orëi se dè da fà por so lingaz dla uma inće tl dagnì.
En gaujiun dl Dé internazional dl lingaz dla uma rengraziëia l'assessur Mussner dötes les porsones che se dà da fà por mantignì so lingaz dla uma te familia, ti ćiamps dla cultura y dla formaziun, sciöche inće tla vita publica.
"Al é de gran importanza da d'adorè le lingaz dla uma cun intenziun por che al vëgnes mantignì. Tl medemo tëmp désson inće desmostrè toleranza y comprenjiun por les atres tradiziuns linguistiches y culturales y se daurì al dialogh cun i atri grups linguistics" à alzè fora l'assessur Mussner.
Le Dé internazional dl lingaz dla uma, metü sö dal'UNO y plü avisa dal'Organisaziun por l'educaziun, la sciënza y la cultura (UNESCO) che vëgn tignì vigni ann ai 21 de forà, mira ala sconanza di apresciapüch 6000 lingac che vëgn baià sura döt le monn.USP
