Atualità
Pröma sentada dla Consulta culturala ladina a Balsan
L’assessur ladin Florian Mussner, Bruno Senoner, Hubert Irsara, Lois Ellecosta y Erika Castlunger é gnüs nominà mëmbri nüs dla Consulta culturala ladina, che s’à incuntè por la pröma sentada en mertesc, ai 22 de aurì a Balsan.
USP - Les competënzes primares dla consulta culturala é chëres da sostëgnì les assoziaziuns y les organisaziuns culturales ladines y da valuté i finanziamënć provinziai por le ćiamp dla cultura. Al ti speta inće da fà propostes por manifestaziuns y ativitês culturales che la Provinzia mët a jì diretamënter. Implü dess la Consulta inće sostegnì la promoziun de manifestaziuns culturales.
L'assessur Florian Mussner alza fora l'importanza dla consulta por la cultura ladina: "Le sostëgn por la cultura ladina é na cossa dër importanta, inće por le dagnì de nosta sozieté y por merit dla formaziun dla consulta podunse śëgn laurè düć adöm por portè inant proieć culturai te nostes valades."
La junta provinziala à nominé da püch les cinch porsones che fej pert dla Consulta culturala por le grup linguistich ladin. Presidënt dla Consulta è de lege l'assessur ladin Florian Mussner, por les assoziaziuns culturales ladines él rové ite Bruno Senoner y Hubert Irsara y sciöche esperć él gnü nominé Lois Ellecosta y Erika Castlunger.
La pröma incuntada dla Consulta culturala é stada en mertesc, ai 22 de aurì dl 2014 a Balsan, olache al é gnü nominé, aladô dla lege provinziala, sciöche sostitut dl presidënt Florian Mussner, Lois Ellecosta.
rc
