Atualità
„I Musiconć de Brema“ baia śëgn inće ladin
Presentaziun dl liber por mitans y mituns “I Musiconć de Brema” inier tl Istitut Ladin a San Martin de Tor
USP - Inier, ai 29 de aurì dl 2014 él gnü presentè tl Istitut Ladin "Micurà de Rü" a San Martin de Tor le liber por mitans y mituns „I Musiconć de Brema" cun les rimes de Silvia Costabiei da La Val. Le liber descrî te na manira poetica la storia di cater musiconć de Brema, n müsc, n ćian, n iat, n ial che prô da s'un sciampè dala mort y da s'organisé na vita deboriada. La particolarité dla publicaziun nöia presentada inier tl Isitut Ladin é che la cuntia di cater musiconć de Brema é gnüda scrita en rima y che le test é acompagné da dessëgns esplicatifs: indöt 47 dessëgns por 47 strofes.
"An à orü porvè da mëte en rima öna dles cunties di Fredesc Grimm por ti fà conësce ales mitans y ai mituns dai 3 agn insö stories adoran n lingaz plü adatè a chël di pici", dij Paolo Vinati, coordinadù dl proiet. Le test dla storia é de Silvia Costabiei da La Val, les ilustraziuns de Carlo Esposito, studënt dl' "Accademia di Belle Arti" de Urbino. Sostëgn ciafa le proiet inće dal assessur ladin Florian Mussner, che dij: "La publicaziun de libri por mitans y mituns cheriëia les fondamëntes por mantignì nosc lingaz en vita inće tl dagnì y fej forsc nasce pro un o l'ater la pasciun por le lingaz dla uma bele da pici insö."
La storia "I Musiconć de Brema" é gnüda publicada pör le prom iade por todësch tl metëman dl 1800 dai Fredesc Grimm. Conesciüs dantadöt por la racoiüda de cunties por mituns, à i Fredesc Grimm publiché dal 1812 al 1858 na gran racoiüda de cunties y fabules dal titul "Kinder- und Hausmärchen", che contëgn inće "I Musiconć de Brema".
Le video cun les strofes y les ilustraziuns por ladin pon inće odëi chilò.
rc
