Atualità
Presentaziun dl liber "Hitler – Beneš – Tito" tla Teßmann
La Biblioteca provinziala Dr. Friedrich Teßmann inviëia ala presentaziun dl liber „Hitler – Beneš – Tito. Konflikt, Krieg und Völkermord in Ostmittel- und Südosteuropa“ en jöbia, ai 29. de mà adöm cun Arnold Suppan, professur dla Academia Austriaca dles Sciënzes.
Tla monografia laurada fora sön la basa de leteratöra y fontanes internazionales vëgnel splighé le svilup dles comunitês de conflit nazionales tl Impêr austroungarich, la rotöra di cecs, slovacs y slavs dl süd cun la monarchia di Habsburg, la politica nazionala y estera de Cecoslovachia y Iugoslavia y la desfata dl regolamënt de pêsc de Versailles, Saint-Germain y Trianon tres Hitler. Implü vëgnel analisé tla publicaziun da trëi volums la politica de devënta dl NS tla Boemia, tla Moravia, tla Serbia, tla Bosnia-Herzegowina y tla Slovenia, le genozid di iüdes te chisc raiuns de ocupaziun, la retüda ai todësc y süa parada demez dala Cecoslovachia y Iugoslavia y ala fin le recort y la storisaziun dla storia de conflit de passa 100 agn.
La Biblioteca provinziala Dr. Friedrich Teßmann inviëia insciö ala presentaziun dl liber
„Hitler - Beneš - Tito. Konflikt, Krieg und Völkermord in Ostmittel- und Südosteuropa"
en jöbia, 29 de mà dl 2014, dales 8 da sëra
tla Bibiloteca provinziala Dr. Friedrich Teßmann,
str. A.-Diaz 8, Balsan
adöm al'autur y referënt Univ.-Prof. Dr. Arnold Suppan, Academia Austriaca dles Sciënzes, Viena y adöm ala Univ.-Prof. Dr. Brigitte Mazohl (Desproch), presidënta dla tlassa filosofich-storica dl'Academia Austriaca dles Sciënzes.Dötes les porsones interessades é dër bel inviades a tò pert.
rc
