Atualità
Presentaziun dles cater peres miliares y de n conzet nü
Tratan i laûrs te na ćiavaria a Vintl de Sura él gnü ciafè da püch indöt cater peres miliares dl’eté romana che fajô pert de na strada antica romana che portâ amesa la Val de Puster fora. Incö (vëndres, ai 8 de agost ) él gnü presentè la descurida tratan na conferënza stampa tla sënta dl Ofize Bëgns archeologics a Frangart. Adöm ales peres miliares él gnü portè dant inće n conzet d'esposiziun nü.
Les peres miliares, anuzades sciöche indicadus de direziuns stradales, ê punć d’orientamënt importanć por viagiadus che passâ amesa la provinzia romana dl Noricum, de chëra che inće la Val de Puster fajô pert. Öna dles peres ciafades a Vondoies mostra le tru ćina Aguntum (dlungia Lienz), dalunć indöt de 63 peres miliares, na lunghëza de presciapüch 90 chilometri. Sön döes dles cater peres miliares él poscibl da identifiché scrites che an é bugn da lì y che é na fontana importanta por la dataziun dles peres. „La pera miliara plü antica é gnüda costruida en onûr dl imparadù Severus Alexander, che é stè a će dl Impêr Roman dal ann 222 al ann 235 do G.C.“, à splighé incö la direturia Catrin Marzoli tratan la conferënza stampa de presentaziun. La secunda pera miliara plü antica é gnüda costruida tratan la perioda dl imparadù Probus (276 ćina 282 do G.C.). Sön la terza pera él ma plü da ciafè de plü framënć de scrites, la cuarta é daldöt zënza scrites.
„La descurida dles peres miliares é la continuaziun de na seria che desmostra la gran importanza dl coliamënt stradal amesa la Val de Puster tl terzo secul do Gejù Christ“, insciö Marzoli. Importanza che vëgn inće testemoniada dala presënza de insediamënć dlungia la trassa stradala che gnô anuzà dai viagiadus sciöche alberch. Inće a Florian Mussner, assessur por i bëgns culturai, ti à la descurida fat plajëi: „La scoverta dles cater peres miliares é n contribut important por l’inrescida y por studié ćiamò plü a funz la perioda di Romans tl Südtirol y di coliamënć costruis te chël tëmp.“ Les peres miliares, insciö Mussner, é na fontana importana por le stüde dla storia dl Südtirol.
L’importanza dla descurida vëgn sotrissada dal Ofize Bëgns archeologics, che à presentè incö n conzet d’esposiziun nü che ti é gnü portè dant ai rapresentanć di Comuns olache les peres miliares é gnüdes ciafades. „Le conzet d’esposiziun dess portè a n incuadramënt unitar dles descurides y aumentè la conescënza sön la storia antica dles peres miliares tla popolaziun südtiroleja“, à dit la direturia Marzoli.
Le conzet prevëiga l’istalaziun de cater tofles cun spligaziuns dles tapes plü importantes dla storia romana tl Südtirol. Les peres originales gnarà metüdes fora te n ofize publich di Comuns te chël che ares é gnüdes descurides. Sön le post dla descurida gnaràl metü so na tofla d’informaziun y recordanza.
rc
Galaria dales fotografies
