Atualità
Formaziun musicala tles scores: Presentè material didatich nü
Por svilupé inant la musicalité y l’interculturalité di scolars dles scores elementares y dla scolina él gnü presentè incö, lönesc ai 22 de setëmber a La Ila le material didatich nü “Le planët sona y ćianta” dal Intendënt por la scora ladina Roland Verra adöm ai auturs Paolo Vinati y Susy Rottonara.
Imparè a conescë le monn dla musiga te na manira plajora meton a confrontaziun plü sorts de musiga da döt le monn: Chisc é i obietifs dles unitês didatiches nöies che é gnüdes presentades incö (22 de setëmber) dal Intendënt por la scora ladina Roland Verra a La Ila. La racoiüda nöia dal inom “Le planët sona y ćianta”, che vëgn publicada dal Departimënt dl’Educaziun Ladin cun le sostëgn de Inovaziun y Consulënza, pita insciö leziuns didatiches sön l’insegnamënt dl’educaziun musicala te n contest de interculturalitè.
Le material didatich é gnü metü adöm dal musicologh Paolo Vinati cun la elaboraziun didatica de Susy Rottonara y contëgn dodesc unitês por l’educaziun musicala interculturala. “Al se trata de material didatich inovatif che dëida svilupé inant les conescënzes musicales y interculturales di scolars tignin cunt inće dla pluralité dles formes dl lingaz musical, deache al mët a confrunt nosta tradiziun cun plü sorts de musighes da perts desvalies dl monn”, à splighé l’Intendënt por la scora ladina Roland Verra. Susy Rottonara, che s’à cruziè dla pert didatica, sotlignëia la funzionalité di materiai: “An à orü ti gní particolarmënter adincuntra ai insegnanć che ne à nia na formaziun musicala spezialistica, dantadöt por les scores elementares, insciö che ai pois portè les scolares y i scolars a conësce plü elemënć dla musiga te na manira scëmpla y plajora.”
I tesć vëgn dant te trëi lingac –ladin dla Val Badia y de Gherdëna, todësch y talian– y é inće adatà por coliamënć interdisciplinars cun d’atres materies d’insegnamënt, insciö che ai po gnì tuć ca por de majeri proieć ia por l’ann de scora inće en colaboraziun cun les scores de musiga. Le coliamënt diret cun i lingać é presënt sön les schedes por les scolares y i scolars inće aladô dl corù desvalì dl logo dl material didatich –vërt por l’ladin, cöce por le todësch y ghel por le talian– insciö che les scolares y i scolars pois atira conësce fora l’lingaz de referimënt di tesć, sciöche pro d’atres publicaziuns didatiches t’atres materies. Na novité reverda la multimedialité di materiai aladô dla realisaziun de n canal aposta sön youtube, daolache ara va da ascutè i toć musicai proponüs por les leziuns.
Implü saràl poscibl da desćiarié i materiai dala plata web de Inovaziun y Consulënza tres la misciun: www.pedagogich.it. La verjiun stampada di materiai sarà da ciafè tres la consultaziun tles scores, scolines, scores de musiga y biblioteches tles valades ladines.
rc
Galaria dales fotografies
