Atualità
Lernerać y segurëza sön le laûr: Conferënza dles Regiuns a Balsan
Representanć dla Provinzia dl Südtirol, dla Lombardia, dl Piemont y dla Val d’Aosta s’incuntarà chësta jöbia a Balsan tl contest dl Fiera Futurm por tratè chestiuns che reverda i lernerać y la segurëza sön le laûr. „Cun chësta incuntada orunse laurè fora na posiziun unitara por miorè la formaziun di lerneri y por smendrì le burocratism tl setur dla segurëza sön le laur“, insciö Kompatscher.
I assessurs Philipp Achammer, Christian Tommasini y Martha Stocker s’incuntarà insciö en jöbia, ai 2 de otober cun i referënć politics dles Regiuns dla Lombardia, dl Piemont y de Aosta por tratè te na incuntada la formaziun di lerneri. „I orun miorè les condiziuns de basa por la formaziun di lerneri, inće por podëi insciö aumentè l’atrativité dl’oferta“, à dit incö le Presidënt dla Junta Kompatscher.
Na secunda tematica sarà inće le smendrimënt dla burocrazia por les dites por ći che reverda la segurëza sön le laûr. „La burocrazia é gonot inće te chësc vers tan alta che i daturs de laûr ne tol sciöche conseguënza nia plü sö lerneri“, insciö Kompatscher. Chësta tematica é gnüda portada dant l’edema da denant dal Presidënt dla Junta Arno Kompatscher tratan la conferënza dles Regiuns a Roma, śëgn gnaràl concordè i proscimi vari danter les Regiuns por porvè da smendrì le pëis burocratich por les dites.
rc
