Atualità
Futurum 2014: Mussner, Achammer y Tommasini à inauguré la Fiera
La 5. ediziun dla Futurum é gnüda inaugurada incö, ai 2. d’otober, dai assessurs por la scora ladina, todëscia y taliana Florian Mussner, Philipp Achammer y Christian Tommasini a Balsan. La fiera pîta por scolars, studënć y geniturs dai 2 ai 4 d’otober na suraodüda di percursc formatifs y profescionai dales scores altes inant ćina ala formaziun universitara y permanënta sön le laûr.
“Cun la Fiera Futurum s’incunta sot a un en tët i ćiamps dla formaziun, dl’artejanat, dl monn dl laûr y dl’economia por ti mostrè deboriada ai scolars, studënć y geniturs dötes les prospetives dl monn dla formaziun y dl laûr“, à sotligné incö (ai 02 de otober) l’assessur por la scora ladina Florian Mussner tratan l’inauguraziun dla cuinta ediziun dla Fiera Futurum a Balsan, a chëra che inće i assessurs por la scora todëscia, Philipp Achammer, y por la scora taliana, Christian Tommasini à tut pert. L'assessur Philipp Achammer à recordè che, "al é le nosc compit da ti dè ai jogn dötes les informaziuns nezesciares por che ai pois tó süa dezijiun te na manira cosciënta." Por l’assessur Tommasini „él important da investì tl plurilinguism y da tó les dezijiuns por ći che reverda la formaziun personala cun pasciun, impëgn y cosciënza, deache chël che vignun de os chiriarà fora sarà important nia ma por le svilup personal mo por chël de döta la sozieté südtiroleja.“
Formaziun y laûr é le moto dla cuinta ediziun dla Fiera dla Formaziun Futurum 2014 dai 2 ai 4 de otober che pîta na suraodüda dles propostes formatives dl monn dles scores altes y profescionales, dla formaziun profescionala, dles Universitês tl Südtirol y tles vijinanzes sciöche inće dles profesciuns plü praticades tl Südtirol. Te plü seminars, presentaziuns, concursc y discusciuns sarà l’interaziun danter la formaziun profescionala y le monn dl laûr al zënter dles debatüdes.
La fiera dla formaziun “Futurum 2014” é partida ite te 4 seturs, plö avisa: la scora alta cun i 3 pilastri de formaziun: lizeums, istituć tecnics y formaziun profescionala (1), l’Université (2), la formaziun permanënta y l’ajornamënt (3) y la consulënza (4). La cuinta fiera dla formaziun “FUTURUM 2014” tol indô en conscideraziun tl setur dla scora alta le conzet di trëi pilastri y presentëia incër chisc pilastri les sorts de scora cun söes spezialisaziuns y cun söes articolaziuns y döta l’oferta por la formaziun profescionala te ćiamps de mistiers desvalies. La Fiera dla Formaziun 2014 é ponsada dandadöt por scolars dla secunda y terza tlassa dles scores mesanes, por scolars di ultimi dui agn dles scores profescionales y dles scores altes, geniturs, personal didatich, studënć y interessà ala formaziun profescionala y permanënta.
Al gnarà dè informaziuns generales y consulënza inće da pert de colaoradësses y colaboradus dl Ofize de formaziun y orientamënt scolastich y profescional, dl Ofize de promoziun universitara, dl Ofize de assistënza scolastica y di servisc por i stipendiums, por i posć te convić y por le marćé dl laûr. Tl cheder dla fiera dla formaziun vëgnel metü a jì le campionat provinzial “Mistiers tla competiziun 2014” che gnarà tignì te indöt 26 profesciuns tl setur dl artejanat, tl’agricoltöra, tl turism tla gastronomia y che ti pîta insciö la poscibilité ai vijitadus da imparè da conësce da plü daimprò i laûrs praticà tl Südtirol. Infos plü avisa pon ciafè söla plata internet www.worldskills.it
Tratan la Fiera gnaràl presentè implü le sistem de formaziun dual dl Südtirol, n’atenziun particolara ti gnarà dada ala scomenciadia MINT che à sciöche obietif la promoziun dles materies tecniches y scientifiches sciöche la matematica, l’informatica, les sciënzes naturales y la tecnica. Un di terminns plü importanć dla Futurum sarà la „Conferënza dla formaziun 2014“ che pîta plü seminars y presentaziuns. Por plü informaziuns: www.futurum.it
La 5. fiera dla formaziun vëgn organisada dala Repartiziun Promoziun dl stüde, Université y Inrescida en colauraziun cun i 3 departimënć por la formaziun y l’istruziun (todësch, talian y ladin), la Repartiziun Formaziun profescionala por l’agricoltöra, i bosć y l’economia de ciasa, cun i ofizi por l’ajornamënt dles repartiziuns dla cultura todëscia y taliana, y inće cun l’assoziaziun di artejans y cun la fiera da Balsan.
rc
