Atualità
INVIT Dodoman (17 d’otober): Dé dla Cultura Ladina a Urtijëi
Dodoman, vëndres ai 17 d’otober gnaral tignì le Dé dla Cultura Ladina dales 15 tla Ćiasa dla Cultura „Luis Trenker“ a Urtijëi. La tematica zentrala é l’aniversar de 75 agn do le mëteman dla perioda dles opziuns tla Ladinia y tl Südtirol y sües conseguënzes por le svilup tles valades ladines. La manifestaziun vëgn organisada dal Assessorat por la scora y cultura ladina.
L’aniversar di 75 agn do les Opziuns tla Ladinia y tl Südtirol sarà chësc ann al zënter dl „Dé dla Cultura Ladina“ che vëgn organisé
dodoman,
en vëndres, ai 17 d’otober
dales 15:00
tla Ćiasa dla Cultura „Luis Trenker“
a Urtijëi.
„Al é important da ćiarè zoruch, recordè i avenimënć storics passà y i analisé tl’otica dles conescënzes che ùn aldedaincö: le Dé dla Cultura Ladina arà insciö chësc ann sciöche tema zentral n’analisa storica dla perioda dles Opziuns tles valades ladines y tl Südtirol“: chëstes les parores de presentaziun dla manifestaziun da pert dl’assessur por la scora y cultura ladina Florian Mussner. Do l’introduziun dl Diretur dla Repartiziun Alexander Prinoth y les parores de salüt dl assessur Florian Mussner, tignarà le storich y autur Leopold Steurer n referat sön „Die Option 1939 in Südtirol: Verlauf, Folgen, Erinnerung“. Daldô presentarà Elfriede Perathoner, insegnata y storica, cun so referat „L’opzions tla valedes ladines“ plü aspeć dla tematica dles opziuns tles valades ladines. Le domisdé gnarà stlüt jö cun na mësa torona de discusciun danter Florian Mussner, Sabine Piazza, Albert Videsott y Werner Pescosta. La moderaziun dl convëgn sarà tles mans dl jornalist dla RAI Alexander Stuffer. La scora de musiga de Gherdëina se fistidiarà dla cornisc musicala.
Düć i interessà é dër bel invià a to pert.
Le program dla manifestaziun é injuntè.
rc
