Atualità
Presentaziun dla "lege omnibus sön l’istruziun" al Consëi scolastich
La presentaziun dl dessëgn de lege por ći che reverda les mudaziuns dla lege provinziala tl setur dl’istruziun y dl status iuridich dl personal didatich, le cheder cualitatif de referimënt dles scolines y scores y le plann anual dles ativitês scolastiches sportives por l’ann 2015 é stades inier (03/11) les tematiches sön l’ordinn dl dé dla sentada dl plenum dl Consëi scolastich provinzial.
Tratan l’incuntada da inier, lönesc ai 3 de novëmber, dl plenum dl Consëi scolastich provinzial, a chëra che al à tut pert inće i assessurs por la scora ladina, todëscia y taliana Florian Mussner, Philipp Achammer y Christian Tommasini, y i intendënć Roland Verra, Peter Höllrigl y Nicoletta Minnei, él gnü portè dant da na seria de esperć la proposta de lege omnibus por ći che reverda les mudaziuns tl setur dl’istruziun y dl status iuridich dl personal didatich, definida „lege omnibus sön l’istruziun“.
La proposta de lege é inće gnüda anunziada inier danmisdé dal assessur por la scora todëscia Philipp Achammer y dal intendënt por la scora todëscia Peter Höllrigl te na conferënza stampa a Balsan.
La proposta prevëiga de plü mudaziuns, danter l'ater por ći che reverda la regolamentaziun dl’azetaziun de credić formatifs extra-scolastics, l’assunziun y le status iuridich dl personal didatich tres na mudaziun dl sistem dles gradatöres che deventass plü sigüdes y l’assiguraziun dla continuité didatica tles scores tres na seria de mosöres che prevëiga na limitaziun dla mobilité di insegnanć y dles insegnantes. Tres la proposta él preodü che la gradatöra por l'assegnaziun di posc de rode restass sciöche ara é y deventass „a esaurimënt“, contemporaneamënter gnissel spo istituì dal ann scolastich 2015 –16 na gradatöra nöia zënza fasces, olache düć i insegnanć abilità po se scrì ite, y che tignarà cunt por vigni candidat de punć (di titui y dl sorvisc). I posc de rode nüs gniss partîs fora, do la proposta de lege, do chësta regolamentaziun: le 50 porcënt ai insegnanć dla gradatöra dl ultim concurs, le 25 porcënt ai insegnanć dla gradatöra atuala (che deventarà permanënta) y le 25 porcënt a chi dla gradatöra nöia. La discusciun dla „lege omnibus sön l’istruziun“é preodüda ai 24 de novëmber tl Consëi scolastich provinzial.
Le Consëi à implü aprovè le cheder cualitatif unitar de referimënt dl sorvisc de valutaziun por les scolines y scores, che tëgn cunt di bojëgns dles realtês scolastiches di trëi grups linguistics. Le cheder de referimënt ti gnarà śëgn menè inant ala Junta provinziala por süa aprovaziun.
Le Consëi à inultima dè jö na valutaziun positiva sön le plann anual dles ativitês sportives scolastiches por l’ann 2015, por ći che reverda l’organisaziun de evënć sportifs, i fonds y programs de ativitês sportives di departimënć (inće fora dla Provinzia, por ejëmpl tl contest dl’Euregio).
rc
