Atualità
Competënzes pedagogiches: 29 educadësses à stlüt jö le percurs de scoraziun
Aprofondì les competënzes tl ćiamp dl laûr pedagogich tla scolina por sostignì le svilup y l'imparè di mituns y mitans tl’eté dla scolina: chësc é stè un di obietifs prinzipai dla formaziun trienala de 29 educadësses che à stlüt jö da püch la scoraziun „Stärkung und Erweiterung der pädagogischen Handlungskompetenz“. Incö ti él gnü surandè ales maestres y colaboradësses le zertificat de contlujiun.
La manifestaziun de contlujiun dla scoraziun cun la surandada di zertificać ales educadësses é gnüda metüda a jì incö domisdé, vëndres ai 14 de novëmber tla scolina Salieta a Urtijëi en presënza dl'assessur por la scora ladina Florian Mussner y dl'Intendënt Roland Verra. L'assessur Florian Mussner à sotligné la gran dediziun dles partezipantes por süa profesciun: "I oress valorisé l'impëgn dles 29 educadësses dla scolina che à investì tröc dis y passa 200 ores por süa formaziun profescionala por fà tres damì so laûr a bëgn de nüsc mëndri." Le savëi sön chësta eté y sön l'imparè da pici s'à dassënn mudé te chisc ultimi agn y al é important da imparè por döta la vita de laûr, insciö l'assessur Mussner. Dal 2011 al 2014 él gnü tignì tres la colaboraziun danter le Ćiamp Inovaziun y Consulënza dl Departimënt Educaziun y Cultura Ladina y la Direziun dles scolines „Ladinia“ n percurs formatif de scoraziun por maestres y colaboradësses pedagogiches dla scolina dla Val Badia y de Gherdëna te chël che al é gnü aprofondì y ajornè les competënzes pedagogiches dles educadësses. La scoraziun dal titul „Stärkung und Erweiterung der pädagogischen Handlungskompetenz“ é gnüda stlüta jö cun n coloquium final dan na comisciun en lönesc y mertesc (10 y 11 de novëmber) da pert dles 29 educadësses che les cualifichëia laprò por so compit zit y fondamental tl'eté zitia danter i 2 y i 6 agn.
La formaziun ê metüda adöm da indöt 10 modui, te chi che al é gnü tratè danter l’ater l’importanza y la valüta dla pedagogia tla cuotidinité, la promoziun dla creativité di mituns, l’importanza dl'ativité fisica y dl jüch lëde por le svilup di mituns, la profescionalité dles educadësses danter ghiranzes istituzionales y ressures personales, la planificaziun dles ativitês pedagogiches, l’acompagnamënt dl passaje di mituns dala familia ala scolina y dala scolina ala scora elementara sciöche inće l’importanza dl’integraziun de propostes formatives bele tla scolina. „Un di fins prinzipai dla formaziun é stè l’aprofondimënt y l’ajornamënt dles competënzes y dles metodes pedagogiches dles educadësses por sostignì le svilup y l'acompagnamënt di mituns y dles mitans, por ejëmpl tres la planificaziun de conzeć pedagogics che favorësces la creativité, le jüch lëde y le movimënt di mituns y che i arjignes ca al passaje dala scolina ala scora elementara“, à splighé l’ispeturia dles scolines ladines Edith Ploner. Ala manifestaziun de contlujiun al inće tut pert la referënta y pedagoga soziala Irmgard Jaedicke. I lingac d’insegnamënt dla scoraziun é stà le todësch y le ladin, tan inant che al ê poscibl.
rc
Galaria dales fotografies
