Atualità
Svilup danter valurs y competitivité: La Scora ladina pënsa a so dagnì
Aldì les propostes por ciafè impulsc concreć tres n dialogh partezipatif: Chësc le fin dles sëres de discusciun danter plü rapresentanc dl monn dla scora ladina che s’à incuntè da püch a San Martin y a Urtijëi por cöi adöm propostes nöies por le svilup dla scora tl dagnì. „Les idees portades dant sarà la basa por na colaboraziun costanta danter les istituziuns“, insciö l’assessur Florian Mussner.
La continuité tla formaziun, la resposta ales esigënzes nöies di scolars y di insegnanć, le tëmp de scora danter bojëgns y limić, le svilup dl sistem formatif, la colaboraziun cun les families y i valurs dl’intlujiun: chëstes é stades les tematiches de discusciun dles döes sëres de discusciun dla Scora ladina che é gnüdes metüdes da jì dal assessur por la scora ladina Florian Mussner y dal intendënt Roland Verra por aldì y cöi adöm, tres n dialogh cun düć i rapresentanć dl monn dla scora, propostes coletives por le svilup dla pedagogia y didatica al'intern dla programaziun scolastica. Te plü intervënć tratan les döes sëres de discusciun él gnü sotrissé che la sozieté s’à mudè cotan ti ultimi agn. „La scora ne po nia s’archité y ara mëss se svilupe inant por respogn ai mudamënć tla sozieté y tla formaziun“, à splighé l’assessur por la scora ladina Florian Mussner, che à ajuntè che öna dles sfidades tl dagnì sarà da ofrì respostes al aumënt dl consumism tecnologich.
„Aldedaincö él debojëgn da trasmët l’importanza de valurs sciöche la solidarieté, l’intlujiun, la toleranza y la richëza dla diversité por la sozieté. Le laûr di maestri é dër ri y al é important da ester bugn da ciafè le dër ecuiliber por ne se ciariè nia sö demassa pëis y laûr.“ Sfidades che an messarà to sö tl dagnì, insciö l’assessur Mussner, sarà la dërta balanza danter ores de scora y impëgns extrascolastics y da ti dè ai jogn la dërta motivaziun da stlü jö so percurs formatif: „I messun motivé nüsc jogn da studié inant, svilupan inant ince l’oferta dles scores altes tles valades ladines.“ Ince l’intendënt Roland Verra vëiga te n potenziamënt dles scores altes tles valades ladines n oportunité por la scora ladina: „Nosta scora paritetica, che ti agn à arjunt n consens dër alt tla popolaziun, é le contest ideal por potenzié l’oferta formatifa dles scores altes.“ Na maiù segurëza por i insegnanć tres na stabilisaziun dles carieres, le mantignimënt dl sistem plurilingual, na reforma partezipativa dla pedagogia y l’aprovaziun de ativitês extra-scolastiches sciöche materies opzionales é por l’intendënt Verra valgönes tematiches che la scora ladina messarà afrontè tl dagnì.
Tratan les döes sëres de discusciun, öna a San Martin y l'atra a Urtijëi, él gnü organisé cinch grups de discusciun danter i rapresentanć dl monn dla scora (presënć danter l’ater de plü direturs y rapresentanć dl Departimënt Scora y Cultura Ladina, ispeturies, rapresentanć dl Université, di consëis de scolina, di geniturs, di studënć, ombolć, assessurs comunai, sorvisc ai jogn y l’ofize dl laûr) por porté dant propostes por respogné ai cambiamënć tla sozieté y tla pedagogia. Por ejëmpl tres l’insegnamënt de competënzes nöies por scolars, la reorganisaziun di orars de scora y dl tëmp lëde y l’interdisciplinarité. Por ti jì pormez ala tematica dl’intlujiun (y integraziun) él gnü portè dant l’idea da arbassè le numer di scolars tles tlasses, da sostignì deplü le conzet cun personal spezialisé y da odëi l’intlujiun sciöche n vantaje y nia n pericul. Atres propostes é stades danter l’ater n conzet plü interdisciplinar y dinamich dles materies, la lerch tl insegnamënt dl lingaz y dla cultura ladina (inće fora dla Ladinia) y na reorganisaziun di impëgns scolastics y extrascolastics por i mituns. Les propostes é gnüdes coiüdes adöm, gnarà elaborades y publicades te n sföi che sarà la basa por la programaziun futura dla scora ladina. „Dër bel dilan a düć chi che à anuzè chësta ocajiun por porté dant sües propostes, nosc impëgn sarà chël da les elaborè te n dialogh costant danter düć i interessá“, à stlüt jö l assessur Florian Mussner.
rc
Galaria dales fotografies
