Atualità
www.manif.it: La verjiun nöia dl portal é gnüda presentada incö a Balsan
Le portal internet www.manif.it cöi adöm y presentëia te na manira scëmpla plü sorts de manifestaziuns, dal ćiamp dla cultura, ala musiga y formaziun, che vëgn metüdes da jì tles valades ladines dl Südtirol: incö, jöbia ai 27 de novëmber él gnü presentè le conzet nü dl portal che vëgn sostignì dales Repartiziuns dla cultura todëscia y ladina.
Cun na grafica daldöt nöia che se adatëia inće ales formes plü modernes dla comunicaziun tecnologica se presentëia da püch le portal internet ladin www.manif.it, olache al vëgn racoiü y publiché les manifestaziuns plü desvalies dles valades ladines dl Südtirol y olachè an po inće dè ite scomenciadies nöies. Le portal internet www.manif.it é n proiet dl Istitut Ladin Micurà de Rü y di Sorvisc Formaziun dla Val Badia y de Gherdëna, che sostëgn sön inćiaria dl Ofize provinzial por la formaziun bele da passa 15 agn i 11 Consëis de Formaziun dles valades ladines. Le proiet de colaboraziun, che é gnü sostignì dales Repartiziuns dla cultura todëscia y ladina, é gnü presentè incö (27/11) a Balsan.
L’assessur Philipp Achammer à sotligné che manif.it é „n ejëmpl garatè de cooperaziun danter i consëis de formaziun y important por le svilup dl'oferta cultura diretamënter söl post. La presentaziun unica y coletiva dles ofertes di consëis de formaziun y l'adoranza di mesi de comunicaziun atuai po dè n impuls ala creaziun de na rëi de interaziun costanta danter les istituziuns y organisaziuns de formaziun." Implü é por l'assessur Achammer n calënder online n stromënt d'informaziun important por podëi ti pitè na suraodüda sön l'oferta cultura y formativa sides ai organisadus dles manifestaziuns co ai consumënć. Por le diretur dl Istitut Ladin Micurà de Rü Leander Moroder é „le portal n’oferta che é gnüda tuta sö bun dala popolaziun, che s'anüza dla plata internet tresfora por s’informè, sciöche al nes vëgn inće confermè dales vijites söla plata.“ Le diretur dl Ofize Formaziun permanënta dla Cultura todëscia Hubert Bertoluzza à sotlignè l'importanza dla realisaziun de proieć de colaboraziun danter i Sorvisc de Formaziun y che ti scemplifichëia le laûr ai volontars che laôra ti consëis de formaziun. N sostëgn finanziar é gnü dè dala Fondaziun Cassa dl sparagn, Klaus Widmann dl consëi de fondaziun à recordè che la Cassa dl sparagn sostëgn bele da plü agn proieć te chësc vers, sciöche por ejëmpl la plata internet kultur.bz.it, n calënder cun les manifestaziuns de döt Südtirol. Na colaboraziun de chëstes döes plates foss, por Widmann, importanta, impede cherié döes ofertes paraleles.
Stephan Ploner, colaboradù dl Sorvisc de Formaziun à presentè adöm a Marion Perathoner, colaboradëssa dla Seziun de Gherdëna dl Sorvisc de Formaziun, les funziuns prinzipales de www.manif.it: „Le portal internet www.manif.it ne é nia ma n calënder dles manifestaziuns, cun chël che an po coordiné y retlamisé manifestaziuns, mo al é implü inće n stromënt de laûr por i Consëis de formaziun che po, três chësc portal, laorè te na maniera profescionala y saurida.“ Insciö él por ejëmpl meso da laorè fora la contabilité, fa relaziuns y statistiches y menè fora newsletter. I Sorvisc de Formaziun coliëia y coordinëia düć i önesc Consëis de Formaziun dla Val Badia y de Gherdëna y dles uniuns che mët da jì manifestaziuns de formaziun. „Al’ann vëgnel publiché söporjö 400 manifestaziuns, ti ultims dui mëisc él ste n valur mesan de 60 porsones al dé che à vijité le portal“, à splighé Ploner.
Le portal internet www.manif.it dess tl dagnì gnì svilupé inant por podëi ti ofrì, tres n'inrescida cuantitativa, n'oferta ćiamò plü detaiada ai organisadus, ai consumënć y ales istituziuns che s'anüza dla plata por s'informè y por comuniché sües manifestaziuns.
rc
Galaria dales fotografies
