Atualità
Dessëgn de lege sön l’istruziun: Plü novitês é preodüdes
La presentaziun dl dëssegn de lege sön l’istruziun da pert di trëi assessurs por la scora incö a Balsan é n vare important tla direziun de na regolamentaziun nöia tl setur dl’istruziun. La Junta provinziala â aprovè n mertesc la proposta de lege portada dant dai assessur Achammer, Mussner y Tommasini y che gnarà menada inant insciö al Consëi provinzial.
L’azetaziun dles ativitês extrascolastiches, l’assunziun dl personal didatich y la garanzia de continuité tla didatica: chisc é i trëi obietifs prinzipai dl dessëgn de lege sön l’istruziun presentè incö, jöbia ai 11 de dezëmber a Balsan dai assessurs por la scora Florian Mussner, Philipp Achammer y Christian Tommasini. „Tres la discusciun ampla y daverta cun les perts interessades él stè meso da adatè le test tresfora cun propostes nöies che jô deojëgn“, à dit l’assessur por la scora todëscia Philipp Achammer incö tratan la presentaziun a Balsan.
Por la scora tles valades ladines prevëiga la proposta de lege sön l’istruziun y sön le status iuridich dl personal insegnant plü mudaziuns, danter l’ater por ći che reverda la stabilisaziun di insegnanć y di direturs, l’assiguraziun dla continuité didatica, sciöche inće la poscibilité por les scores da azetè ativitês extrascolastiches sciöche materia facoltativa dl percurs didatich. „I vantaji por la scora ladina cun la proposta de lege é danter l'ater le mantignimënt dla valüta anuala dles gradatöres d’istitut che é de gran importanza por l’assegnaziun di posć lëdi de suplënza deache ara po garantì n’assegnaziun de n post por i insegnanć che à stlüt jö da püch n stüde y che po se iscrì insciö vigni ann tles gradatöres“, à splighé incö l’assessur por la scora ladina Florian Mussner che à ajuntè: „Implü vëgnel favorì, tres la poscibilité da integrè ativitês extrascolastiches sciöche materies facoltatives tl percurs didatich, la cooperaziun cun i partners de formaziun sciöche por ejëmpl cun les scores de musiga. Vigni scora à l'autonomia da to la dezijiun singularmënter sön l'azetaziun eventuala de ativitês extrascolastiches.“ Inće por l’assessur por la scora todëscia Philipp Achammer é la regolamentaziun nöia, che dess gnì stabilida tres criters de cualité tlers, n renforzamënt dl’autonomia dles scores.
N ater punt important dla proposta de lege nöia reverda l’assunziun dl personal didatich. Tres la proposta él preodü che la gradatöra por l'assegnaziun di posć de rode restes sciöche ara é y deventes „a esaurimënt“, contemporaneamënter gnissel spo istituì dal ann scolastich 2015 –16 na gradatöra nöia zënza fasces, olache düć i insegnanć abilità po se scrì ite, y che tignarà cunt por vigni candidat de punć (di titui y dl sorvisc). I posć de rode nüs gniss partis fora, do la proposta de lege, do chësta regolamentaziun: le 50 porcënt ai insegnanć dla gradatöra dl ultim concurs, le 25 porcënt ai insegnanć dla gradatöra atuala (che deventarà permanënta) y le 25 porcënt a chi dla gradatöra nöia. Le terzo obietif che dess gnì arjunt cun la proposta de lege nöia é la promoziun y le sostëgn dla continuité didatica. Insciö él preodü danter l’ater n ampliamënt dl organich suplementar che dess ti dè ai insegnanć la poscibilité da stabilisé deplü sües carieres scolastiches.
L’assessur por la scora taliana Christian Tommasini à sotligné te so intervënt i punć prinzipai dla proposta de lege nöia por la scora taliana, dandadöt por ći che reverda l’azetaziun de credić formatifs extra-scolastics. „La scora ne po nia se fistidié de vigni forma dl imparè y avisa por chësta rajiun é l’integraziun de ativitês extrascolastiches n arichimënt por la formaziun“, à dit l’assessur Tommasini. Do l’arat positif dl Consëi scolastich y cun l’aprovaziun da pert dla Junta provinziala passa le dessëgn de lege śëgn al Consëi provinzial, olache al gnarà tratè de dezëmber tla comisciun legislativa competënta. Plü informaziuns pon ćiafè sön: www.provinz.bz.it/bildungsdialog.
rc
Galaria dales fotografies
