Atualità
„L’energia tles Alpes“ – Daurida dla mostra ai 12/01 tl’Université a Balsan
La storia dl‘eletrificaziun dl raiun dles Alpes tres les trasmisciuns di archifs é tl zënter dla mostra ambulanta di archifs statai y provinziai dles provinzies dl’ArgeAlp. La mostra ambulanta podarà gnì vijitada por n mëis inće tl'Université Lëdia de Balsan.
Dal 1972 incà laôra 10 provinzies dles Alpes, di Paîsc Todësc, dl‘Austria, dla Talia y dla Svizera te ćiamps desvalis tl cheder dl’ArgeAlp. N contribut important por mantignì le patrimone cultural vëgn dai archifs statai y provinziai, olache i direturs y les direturies se barata fora vigni ann pro conferënzes y realisëia proieć.
Le produt plü jonn de chësta colaboraziun é la mostra ambulanta „Alpen unter Strom / L’energia nelle Alpi“ (L’energia tles Alpes), pro chëra che vigni archif partner à arjigné ca dui panì. Do de plü agn de planificaziun y laûr sot la bachëta dla Direziun generala di archifs statai de Bayern él gnü daurì la mostra ai 21 d’otober dl 2013 a München. Śëgn éra rovada a Balsan, olache ara vëgn daurida dal assessur provinzial Florian Mussner
ai 12 de jenà dl 2015
dales 18.00
tl'alzada a tera
dl'Université Lëdia de Balsan.
Le contribut de Balsan, che é gnü laurè fora dal archif provinzial dl Südtirol y dal archif statal de Balsan deboriada, cunta dl svilup lunch dl’eletrificaziun dl Südtirol dala fin dl 19ejim secul ćina ti agn cincanta dl 20ejim secul, dala fondaziun de de pici implanć idroeletrics por la fornidöra de strom de de pices infrastrotöres y de chëres mesanes ala fondaziun di „Etschwerke“ ćina ala realisaziun de de gran proieć sciöche le lêch artifizial de Resia cun i implanć por l’industria dl‘Italia dl nord.
A Balsan é la mostra ambulanta daverta ćina ai 12 de forà dl 2015 tl alzada a tera dl’Université dal lönesc (vigni dé dales 8.00–18.00) ala sabeda (8.00–13.00). Sön domanda pîta l’archif provinzial y l’archif statal vijites acompagnades por tlasses de scora. Por prenotaziuns prëibel contatè l'Archif provinzial dl Südtirol (tel.: +39 0471 411941; email: landesarchiv@provinz.bz.it).
De plü informaziuns é da ciafè sot: www.alpen-unter-strom.eu .
USP
