Atualità
Aprov. dla lege sön l’istruziun- Mussner: Ara garantësc continuité didatica
L’aprovaziun dla lege che reverda le setur dl’istruziun y dl status iuridich dl personal didatich da pert dl Consëi provinzial porta para, insciö l’assessur Florian Mussner y l’intendënt Roland Verra, plü vantaji inće por la scora paritetica ladina tres l’azetaziun dles ativitês extrascolastiches, la regolamentaziun sön l’assunziun dl personal didatich y la garanzia de continuité tla didatica.
La lege nöia sön l’istruziun y sön le status iuridich dl personal didatich é gnüda aprovada incö, vëndres ai 16 de jenà, dal Consëi provinzial. Ara é gnüda metüda adöm tres la colaboraziun di trëi assessurs por la scora tl Südtirol, Christian Tommasini, Philipp Achammer y Florian Mussner, adöm al’intendënta Nicoletta Minnei y ai intendënć Peter Höllrigl y Roland Verra. La proposta dla lege nöia é gnüda realisada tres n prozès partezipatif te incuntades de discusciun publica, döes de chëstes inće tles valades ladines, olache al é gnü debatü sön le svilup dla scora. I trëi obietifs prinzipai é l’azetaziun dles ativitês extrascolastiches tl percurs de formaziun, na regolamentaziun nöia sön l’assunziun y sön la stabilisaziun dl personal didatich y la garanzia de continuité tla didatica. „Chisc trëi pilastri dla lege omnibus é inće gnüs confermà dala letöra y aprovaziun tl Consëi scolastich provinzial, un di punć prinzipai reverda l’azetaziun dles ativitês extrascolastiches sciöche materies facoltatives tl percurs de formaziun. Les dezijiuns sön l’azetaziun dles ativitês podarà gnì tutes autonomamënter dales scores“, insciö l’assessur por la scora ladina Florian Mussner. Inće por l’intendënt por la scora ladina Roland Verra é l’azetaziun dles ativitês extrascolastiches n’arjunta importanta „deache ara aumentëia la cooperaziun cun i partners de formaziun, sciöche por ejëmpl les scores de musiga y les uniuns sportives, mo ti lascia la dezijiun sön les materies facoltatives ales scores instësses“, insciö l’intendënt Verra.
N ater aspet da alzé fora por la scora tles valades ladines reverda la stabilisaziun di insegnanć y di direturs y l’assiguraziun dla continuité didatica. „Cun l'unificaziun dl sistem dles gradatöres él i insegnanć che à la poscibilité da stabilisé deplü sües carieres scolastiches y tres l’ampliamënt dl organich suplementar saral poscibl da mët a desposiziun 175 posć implü a livel provinzial“, insciö l’assessur Florian Mussner. Por la scora ladina é danter l'ater le mantignimënt dla valüta anuala dles gradatöres d’istitut de gran importanza por l’assegnaziun di posć lëdi de suplënza „deache ara po garantì n’assegnaziun de n post por i insegnanć che à stlüt jö da püch n stüde y che po se iscrì insciö vigni ann tles gradatöres“, insciö l’assessur Mussner che à ajuntè che la lege nöia à insciö tignì cunt di bojëgns dles realtês scolastiches di trëi grups linguistics.
rc
