Atualità
Dala Junta: I mëmbri nüs dl Consëi dla Fondaziun Museion é gnüs nominà
Antonio Lampis, Walter Angonese, Marion Piffer Damiani y Barbara Pizzinini: chisc é i mëmbri nüs dl Consëi dla Fondaziun Museion che é gnüs nominà incö (03/02) dala Junta provinziala. I obietifs, les prioritês y la funziun dla Fondaziun gnarà presentà te na conferënza stampa dal assessur Philipp Achammer en jöbia ai 5 de forà.
L’inćiaria dl Consëi dla Fondaziun Museion é chëra da elaborè les diretives strategiches dl museum de ert moderna y contemporanea de Balsan y da acompagné l’ativité d’esposiziun dles operes d’ert, sciöche inće da valuté y aprovè le budget anual. Le Consëi de Fondaziun é metü adöm da 5 mëmbri: 4 de chisc vëgn nominà dala Provinzia de Balsan, le cuinto vëgn proponü sciöche rapresentant dl monn dl’economia, dla cultura y dla sozieté zivila.
"I cater mëmbri dl Consëi de Fondaziun che é gnüs nominà pro i proscims trëi agn dala Junta provinziala é Antonio Lampis por le grup linguistich talian, Walter Angonese y Marion Piffer Damiani por le grup linguistich todësch y Barbara Pizzinini por le grup linguistich ladin", à dit incö, mertesc ai 3 de forà le presidënt dla Provinzia Arno Kompatscher y à sotligné che sciöche cuinto mëmber à la Junta fat la proposta de nominé, sce l'assoziaziun dl Museion é a öna, Peter Haselsteiner sciöche rapresentant dla sozieté zivila.
La strotöra, i compić, les prioritês y la funziun dl Consëi dla Fondaziun Museion gnarà presentà plü avisa dal assessur por la cultura Philipp Achammer te na conferënza stampa
en jöbia, ai 5 de forà dl 2014
dales 14.00
tl Museion
strada Dante 6
a Balsan.
rc
