Atualità
Les trëi Consultes di Jogn é gnüdes nominades – Start deboriada
La Junta provinziala à nominé incö (03 de forà) les Consultes di Jogn nöies por i grups linguistics ladin, todësch y talian. Les Consultes di Jogn é n organ consultif dla Junta provinziala sön temesc che reverda i jogn. La dorada dl’inćiaria é de trëi agn. La pröma sentada dles Consultes gnarà tignida por le pröm iade deboriada, sciöche sëgn de na colaboraziun plü strënta, ai 26 de merz.
Sön proposta di trëi assessurs por la cultura Florian Mussner, Christian Tommasini y Philipp Achammer à la Junta provinziala nominé incö, mertesc ai 03 de forà, les trëi Consultes di Jogn por le grup linguistich ladin, todësch y talian. Por amplié y renforzè la rëi de colaboraziun danter les trëi Consultes di Jogn gnaral organisé la pröma sentada deboriada ai 26 de merz en presënza di trëi assessurs competënć.
„L'organisaziun dla pröma sentada düć deboriada é n sëgn important de na colaboraziun strënta danter les trëi Consultes di Jogn por döta la dorada dl’inćiaria“, insciö i trëi assessurs Mussner, Tommasini y Achammer. I assessurs sotlignëia che la rëi de colaboraziun danter les Consultes é importanta por amplié y renforzè la convivënza tl interès di jogn. Les Consultes di Jogn é formades da porsones jones y da porsones che se dà jö cun la jonëza, che vëgn nominades dales assoziaziuns di jogn y dai Comuns. Implü fejel ćiamò pert dla Consulta n rapresentant / na rapresentanta dl Consëi Scolastich provinzial.
Por ći che reverda le grup linguistich ladin à la Junta provinziala nominé sön proposta dl'assessur Florian Mussner por le pröm iade tla Consulta di Jogn incö: Linda Demetz (Urtijëi), Christian Pescoll (Urtijëi), Gabriel Stuffer (Urtijëi) y Nadine Miribung (Corvara). Confermà él gnü Valentin Erlacher (Mareo), Doris Mussner Delago (Sëlva),Gottfried Nagler (Badia), Milena Kostner (Urtijëi), Florian Valentin (Badia), Vito Campei (La Val) y Lena Mulser (rapresentanta Consëi scolastich).
Tla Consulta di Jogn nöia dl grup linguistich todësch él gnü nominé: Ludwig Andres (Prad), Hannes Waldner (Maran), Lukas Roner (Balsan), Florian Andres (Balsan), Lukas Nothdurfter (Balsan), Sara Mahlknecht (Eppan), Isabel Gallmetzer (Margreid). Implü él gnü nominé dai Comuns: Thomas Hofer (Barbian), Verena Mittelberger (Balsan) und Samuel Gatterer (Pfalzen).
Por ći che reverda la Consulta di Jogn dl grup linguistich talian él gnü nominé 14 rapresentanć, danter chisc: Corrado Finocchiaro (Bornech), Tobia Maio (Leifers), Luna Dairy Elisabeth Torres (Porsenù), Adelina Perlaska (Balsan), Elisabetta Sabatino (Balsan), Alessio Spitaleri (Balsan), Alessandra Volanti (Balsan), Salvatore Curtì (Balsan), Nicholas Santini (Salurn), Valentina Stimpfl (Balsan), Lara Franceschini (Balsan), Matteo Graziosi (Balsan), Domenico Rosani (Maran) und Jacopo Dezulian (rapresentant Consëi scolastich).
Le compit prinzipal dles Consultes di Jogn é chël da aconsié la Junta provinziala sön tematiches che reverda i jogn y dà jö arać sön le finanziamënt de proieć y sorvisc por i jogn. Ares à inće la funziun de aconsiadësses por l’elaboraziun de propostes lege y inrescides che reverda la jonëza.
Les Consultes se incunta regolarmënter por se baratè fora sön domandes, propostes y problematiches che reverda le monn di jogn por chirì adöm soluziuns y dè jö tutes de posiziun. Vigni Consulta po formè grups de laûr y damanè do l’arat de esperć. La basa iuridica dl ativité y dla formaziun dles Consultes é la lege provinziala nr. 13 dl 1983.
rc
