Atualità
Dala scolina ala scora alta: Program de publicaziuns ampl por le 2015
N program fit cun plü presentaziuns de material didatich nü é preodü inće chësc ann tres le Ćiamp Inovaziun y Consulënza dl’Intendënza ladina che se crüzia dantadöt dl’elaboraziun de publicaziuns aposta dales scolines ćina les scores altes dles valades ladines. Dan da püch s’à l'assessur Florian Mussner incuntè cun i colaboradus por tratè i proieć por le 2015 y por vijité i ofizi.
Realisé publicaziuns che reverda la realté locala, che tëgn cunt dl svilup pedagogich y che po gnì integrades tl sistem scolastich paritetich dles valades ladines: Chisc é danter l'ater trëi di obietifs dla publicaziun de material didatich ajornè por le monn dla scora ladina da pert dl Ćiamp Inovaziun y Consulënza dl'Intendënza scolastica ladina. Le material didatich por l’insegnamënt dl ladin y por l’educaziun linguistica integrada vëgn conzepis sides dal punt de odüda dl contignü co por ći che reverda la realisaziun grafica dal Ćiamp Inovaziun y Consulënza, che é tl medemo tëmp inće editur de düć i material.
Da püch s'à l’assessur por la scora ladina Florian Mussner abiné cun le diretur dl Ćiamp Felix Ploner y i colaboradus/les colaboradësses por tratè i proieć che gnarà portà inant tl 2015. „Inće chësc ann él preodü na ligna de publicaziuns nöies por la scora ladina che reverda düć i livì de formaziun, dala scolina ala scora alta. Insciö gnaràl presentè proscimamënter la CD con ćianties religioses „Gejù cun te poi crësce“, che é gnüda tuta sö cun mitans y mituns dla 4a y 5a scora elementara da La Val, sciöche inće les cater unitês d’insegnamënt nöies por ladin che reverda la storia dl 19ejimo y 20ejimo secul y che po gnì anuzades tles scores altes tratan les ores de ladin y storia“, sotlignëia l’assessur Mussner.
Les unitês didatiches é gnüdes elaborades da Luciana Palla y Magdalena Miribung en colaboraziun cun Erna Flöss. Implü él sön le program la presentaziun de unitês d'acompagnamënt dl insegnamënt por la scora elementara „Laurun deboriada 1 y 2“, la scatora cun material didatich por la scolina „Suri“ y la publicaziun dla brosciüra d’ajornamënt cun 80 cursc de formaziun por i insegnanć y insegnantes.
"Tratan l'incuntada él gnü presentè le program dles ativitês por le 2015 y l’assessur s’à desmostrè entusiast dl’ativité fita y à rengrazié por les scomenciadies metüdes a jì y por l’impëgn de vigni colaboradù, assiguran so sostëgn inće tl dagnì", sotrissëia le diretur Felix Ploner. Implü à l’assessur Mussner anuzé l'ocajiun por incuntè döt le personal de secretariat y dla contabilité, i colaboradus impegnà pro le sorvisc por l’ajornamënt dl personal pedagogich, le sorvisc por la consulënza informatica y tecnologies nöies, grafica y layout, ćina ai sorvisc por l’inovaziun didatica y por la documentaziun che se dà jö cun le svilup y l’elaboraziun de material didatich por les scores dles valades ladines.
N ater sorvisc che é inće aćiase pro le Ćiamp Inovazion y Consulënza é le Sorvisc por l’evaluaziun dles scores y dles scolines ladines che à danter l’ater le compit da cöie adöm, analisé y interpretè i dać che va debojëgn por valuté le sistem de formaziun de nosta Provinzia, valuté n valgügn aspeć y elaborè relaziuns scrites sön i resultać.
Dötes les ativitês dl Ćiamp Inovazion y Consulënza é da ciafè sön le sit pedagogich.it
rc
