Atualità
40 agn lege RAS: „N coliamënt fondamental cun la cultura todëscia y ladina"
L’Aziënda Speziala dla RAS garantësc da oramani 40 agn la trasmisciun de programs radio y televisifs ladins y todësch di Paîsc confinanć.„Chësc colegamënt cun i raiuns dla cultura todëscia y ladina é dër important por le svilup de nostes mendranzes“, sotlignëia le presidënt dla Provinzia Arno Kompatscher. La basa é gnüda ponüda avisa dan da 40 agn, ai 13 de forà dl 1975, cun la lege dla RAS.
Bele tl ann 1974, n ann dan la lege sön la RAS él gnü sotescrit i contrać cun les emitënzes de Stat dl ORF, ZDF, ARD y SRG che pormetô insciö la rezeziun di programs dl’Austria, Germania, dla Svizra y dl Südtirol. „Cun i programs che la RAS nes assigurëia él stè poscibl da svilupé n lian important cun les arees linguistiches y culturales todëscia y ladina. Chësc coliamënt fondamental rapresentëia inće na pert esenziala por la cresciüda y le svilup di grups lingustics todësch y ladin“, sotlignëia le presidënt dla Provinzia Arno Kompatscher.
Cun le passè dl tëmp à la RAS amplié süa ativité y se fistidiëia aldedaincö de na ligna ampla de sorvisc dla telecomunicaziun: ara gestësc indöt 80 implanć de trasmisciun sön le teritore che vëgn metüs a desposiziun sciöche postaziuns uniches y coletives por dötes les emitënzes radio/televisives, por i gesturs de telefonia y por les comunicaziuns d'emergënza dla proteziun zivila. Implü garantësc la RAS la trasmisciun te na cualité digitala de programs de 16 emitënzes radiofoniches. L’impëgn prinzipal dla RAS ti ultims agn é stè chël da portè inant la realisaziun dla rëi dl internet asvelt tl Südtirol. La RAS costruësc adöm ai Comuns indöt 130 punć de coliamënt por la fira otica por assiguré l’internet asvelt te düć i Comuns dl Südtirol. Ara se fistidiëia por porté a fin chësc proiet tl tëmp plü cört poscibl tolon en conscidraziun les ressurses finanziares y de personal desponibles. Por chësta rajiun à la RAS inće orü renunzié a festejé te na gran manira sü 40 agn dala fondaziun, i mesi finanziars gnarà metüs a desposiziun por l’ampliamënt dla rëi dl internet asvelt.
En gaujiun di 40 agn dala nasciüda dla RAS él impò preodü por la popolaziun plü scomenciadies por podëi imparè da conësce l’ativité dl’aziënda speziala da plü daimprò: tratan l’isté gnaràl pité vijites acompagnades ti dui implanć plü gragn sön Plan de Corones y dla Muta cun informaziuns sön i aspeć desvalis che reverda la telecomunicaziun. Les dates dles escursciuns publiches gnarà comunicades plü inant.
rc
