Atualità
Pröma sentada di rapresentanć di scolars dl‘Euregio ai 09/03
En lönesc, ai 09/03 s'incunta i rapresentanć dles scolares y di scolars dl‘Euregio por presentè deboriada sües ghiranzes, danterater sön „l’educaziun politica“, la mobilité y i sistems de valutaziun y por se baratè fora cun le rapresentant di scolars federal austriach Lukas Faymann. Do la sentada plenara danmisdé él preodü na conferënza stampa dales 14.30.
L’educaziun politica, la mobilité y i sistems de valutaziun conzeć dla colaboraziun é al zënter de n'incuntada danter i rapresentanć di scolars dl‘Euregio cun le rapresentant dles scolares y di scolars federal austriach Lukas Faymann ai 09 de merz dl 2015 tl Consëi provinzial de Balsan. Tratan le danmisdé dl 09/03 él insciö preodü na sentada plenara tl Consëi provinzial de Balsan, tl cheder de chëra che i trëi assessurs por la scora Florian Mussner, Christian Tommasini y Philipp Achammer saludarà les rapresentantes y i rapresentanć dles scolares y di scolars interregionai, a chëra che inće les colaboradësses y i colaboradus di media é dër bel invià.
Do l'incuntada plenara ti gnaràl presentè al publich n conzet por na colaboraziun de de plü agn danter rapresentantes y rapresentanć dles scolares y di scolars cun l'Euregio. La conferënza stampa dl'incuntada gnarà tignida
en lönesc, ai 9 de merz dl 2015,
dales 14.30
tla curt interna dl Palais Widmann
a Balsan.
I conzeć dla colaboraziun, sciöche inće les ghiranzes por le dagnì, gnarà portades dant da Milena Fallaha (presidënta dl Consëi scolastich ladin), Matthias von Wenzl (presidënt dl Consëi scolastich todësch), Jacopo Dezulian (presidënt dl Consëi scolastich talian), Nicola Pifferi (presidënta dl Consëi scolastich de Trënt), Clara Köhler (rapresentanta scolastica dl Tirol por les SPMA), Johannes Schretter (rapresentant scolastich dl Tirol por les SA), Lukas Faymann (rapresentant federal) y dal secretêr general dl‘Euregio Mag. Matthias Fink.
I punć sön l’ordinn dl dé dla sentada generala dl danmisdé tl Consëi provinziala sarà (1) le salüt y la constataziun dl numer legal, (2) i salüć di assessurs provinziai, (3), i salüć dl secretêr general dl‘Euregio Mag. Matthias Fink, (4) i salüć dl rapresentant dles scolares y di scolars federal austriach Lukas Faymann, (5) la presentaziun dles rapresentantes y di rapresentanć dles scolares y di scolars y (6) la presentaziun dles ghiranzes, discusciun y deliberaziun.
rc
