Atualità
Dé di museums dl Südtirol: Le 2015 é dediché ai jogn
Söporjö 100 esperć y colaboradus di musems dl Südtirol s’à incuntè incö, lönesc ai 2 de merz tl Museion da Balsan por la nona incuntada anuala tl contest dl Dé di Museums dl Südtirol. Le tema prinzipal dl’incuntada é stè „Young & Museum“, la vijiun che fajarà da cornisc por döt l’ann tematich.
Le Dé di Museums dl Südtirol é na scomenciadia metüda adöm por esperć dl setur che laôra tl ćiamp cultural dl Südtirol y che vëgn organisada vigni ann dala Repartiziun Museums. Chëra da chësc ann é l’ediziun numer nü che é gnüda dedicada ala tematica zentrala dl 2015 dal titul „Young & Museum“. L’obietif de „Yount Museum“, na plataforma virtuala che an po ciafè inće sön internet (http://www.museen-suedtirol.it/youngmuseum/de/default.asp), é chël da motivé les jones y i jogn tres danü da se dè jö y s’informè sön le monn di museums y les ofertes che vëgn pitades aposta por ëres y ëi. Söporjö 100 esperć y espertes à tut pert incö (02/03) ala manifestaziun de formaziun. Por tröc museums é le Dé di Museums inće n’ocajiun da anunzié la daurida do la palsa da d’invern y na poscibilité d’incuntada cun i responsabli de d’atri musemus por se baratè fora sön esperiënzes y idees nöies.
L’assessur por i museums Florian Mussner à sotligné l’importanza de chësta manifestaziun de formaziun, „por amplié la rëi danter i museums, inće deache i sun sigü che i museums à na gran importanza te nosta sozieté por la costruziun de n dagnì de pêsc y comprenjiun. Implü él important che i jogn vëgnes motivà da aprofondì les ofertes che vëgn pitades“. L’assessur à inće rengrazié düć i colaboradus y les colaboradësses por so impëgn tl ćiamp cultural y ti aôda inant n ann plëgn de sodesfaziuns y de suzès.
La direturia dla Repartiziun Museums Karin Dalla Torre à daldô presentè na suraodüda sön les dates plü importantes por l’ann 2015, danter chëstes le „Dé internazional di Musems“ ai 17 de mà, le „Dialogh di Museums dl Südtirol“ en colaboraziun cun l’Academia di Museums dl Payern ai 20 y 21 de mà sön Ćiastel Goldrain y le contest temtatich dl ann che reverda i jogn. „L’ann 2015 sarà por düć i partezipanć n ann intensif y important y che arà cun le Dé di Museums dl Tirol storich de otober n ater punt culminënt. Inće chësc dé arà sciöche tematica zentrala i jogn y i museums“, insciö la direturia Dalla Torre.
La manifestaziun de formaziun é gnüda daurida dal grup F8 da Viena (n grup de educadësses jones y artistes de performance) che à portè dant na performance interativa dal inom „Las Gaffas!“.
La comuncaziun strategica y le conzet dl ann tematich "I jogn y i museums", che vëgn organisé dala Repartiziun Museums adöm cun i Sorvisc ai Jogn, é gnü presentè daldô da Ute Duregger, la coordinadëssa dl ann tematich y dl Dé di Museums dl Südtirol. Plü inant él spo gnü presentè da Barbara Pizzinini y da Barbara Griessmair dla coopertiva soziala dl EOS le proiet „JAI – Jonëza Laûr Integraziun“, che prevëiga l’inserimënt di jogn y dles jones tl monn dl laûr y che po inće gnì adatè contestualmënter ai museums. Margit Scheigkofler, Giulia Rasola, Monika Lintner y Johanna Platzgummer dl Museum Natöra à informè i presënć sön l’esperimënt „Vëia de Natöra?“ cun chël che al é gnü realisé plü films sön i punć de odüda dles jones y di jogn sön la tematica dla „natöra salvara“. Ala fin à Ester Erlacher dla Repartiziun Museums portè dant le proiet „mu-ju-k“ che à sciöche fin chël da motivé i jogn da se dè jö, tres l’acompagnamënt profescional de artisć y artistes, cun i obieć ti museums.
rc
Galaria dales fotografies
