Atualità
Scora: I dac sön l'afluënza al scioper da incö (05 de má)
Di 342 insegnanc dles scores ladines dla Provinzia da Balsan, ne à incö, mertesc ai 05 de má, 8 nia laurè fajon para al scioper nazional dles scores. La porcentuala che à fat para a chësta protesta é insciö de 2,3 porcënt tles scores ladines. 42,29 porcënt di insegnanc á scioperé tles scores talianes, 18 porcënt te chëres todësces.
Le scioper é gnü protlamé dai sindacac te döta la Talia por protesté cuntra la reforma scolastica dl govern de Roma. Indöt á fat para te Südtirol 1910 insegnanc ala protesta. Do les informaziuns dl'Intendënza Ladina à le 2,34 porcënt dles maestres y di maestri dles scores elementares, mesanes y altes de Gherdëna y Badia fat para al scioper. Plü avisa á scioperé 3 maestri dla scora alta dl ITE Raetia y 5 maestri dla Scora d'Ert „Cademia“. Tles atres direziuns de Urtijëi, Sëlva, Badia y Al Plan de Mareo y tl zënter dles scores altes de La Ila ne él gnü registré degun scioper, degun diretur y degöna direturia ne á scioperé.
Por ci che reverda les scores todësces dla Provinzia de Balsan, ál fat para al scioper 1041 maestri y maestres, de chëstes él 758 insegnanc y insegnantes che á n contrat a tëmp indeterminé. La porcentuala dl scioper é do les informaziuns dl’Intendënza todëscia de indöt 18 porcënt. Degun diretur y degöna direturia ne á scioperé.
Tles scores che vëgn organisades dal’Intendënza scolastica taliana ál tut pert indöt 42,29 porcënt di insegnanc. Di 2026 insegnanc á scioperé insciö 861 maestres y maestri y 3 direturs dles scores.
Por ci che reverda la partezipaziuns di scolars al scioper ne él gnü anunzié degügn dac ofiziai.
rc
