Atualità
Mostra virtuala dl Archif provinzial: Documentaziuns dla Gran Vera
En recordanza dl aniversar di 100 agn dala detlaraziun de vera dla Talia al Imper Austro-ungarich ai 23 de ma dl 2015 á l’Archif provinzial presenté incö na mostra virtuala nöia. Chësta dess ester n contribut por ponsé do y se dé jö cun les tematiches dla Gran Vera, á recordé le presidënt Arno Kompatscher y l’assessur Florian Mussner tratan la presentaziun a Balsan.
La mostra virtuala nöia „Recordanzes dla Pröma Vera Moniala“ é na racoiüda online de retrac y tesć che reverda la Pröma Vera Mondiala (1914 – 1918). Ara é partida sö aladô de nü tematiches desvalies: dai avenimënc sön le frunt, al militer, la propaganda de vera, la posta di soldas, l’aministraziun militara, i diari y les recordanzes, imprësć de vera, l’economia de vera, le frunt dla patria, la situaziun dles mangiaries y la fin dal vera. Indöt él poscibl da ti ciaré y da desćiarié jö 160 retrac y tesć.
L’obietif prinzipal dla mostra nöia é chël da ti mostré i retrac y i tesć a le plü gran numer de interessá poscibl presentan la racoiüda sciöche na fontana d’informaziun y de reflesciun storica, á sotligné incö, jöbia ai 21 de ma, le presidënt dla Provinzia Arno Kompatscher y l’assessur por i bëgns culturai Florian Mussner.
„Perzeziuns nazionalistiches y imperialistiches dla politica europeica dan la Pröma Vera á porté a na catastrofa mondiala, nosc impëgn mëss ester chël da imparé dai avenimënc dl tëmp passé por tó les dërtes dezijiuns tl presënt y tl dagní“, á sotligné le presidënt Kompatscher. „I ne podun nia se desmentié da olache i gnun, por savëi olache i messun jí: do mia minunga él ma poscibl da jí tla direziun de n’Europa che contëgn i prinzips dla colaboraziun, dla pluralité y dla pesc“, á splighé Kompatscher.
Öna dles paladines plü adatades por la colaboraziun danter les regiuns europeiches é chëra culturala, á splighé l’assessur Florian Mussner che á dit inant, che la presentaziun online dl Archif provinzial é ince n contribut important por n vire deboriada pazifich. „I retrac y les recordanzes dla Pröma Vera á na valüta storica dër importanta ince deache i ne ún nia plü testimoni dl tëmp che pó nes cunté i avenimënc sozedüs“, insciö l’assessur Mussner.
Les fontanes storiches che pó gní inrescides tres mostra online, á recordé la direturia dl Archif provinzial Christine Roilo, „é na odüda rapresentativa de düc i documënc presënc tl Archif provinzial che documentëia la Gran Vera“. Dantadöt é la mostra nöia n invit ai scolars da dé n’odlada ai avenimënc y ales fontanes storiches dla Pröma Vera, insciö la direturia Roilo.
Da odëi é la mostra virtuala nöia „Recordanzes dla Pröma Vera Mondiala“ online, sot ala misciun: http://bildarchiv.prov.bz.it/SLA_expo/categories/234.
rc
Galaria dales fotografies
