Atualità
L’ass.Mussner sön la mudaziun a cé dla Generela: Aprijamënt por le laur fat
Prësc set agn é Elsa Zardini stada a cé dl’Union Generela di Ladins dla Dolomites. Cun la fin de ma ára dé jö süa inciaria. „I oress rengrazié la presidënta Zardini por so laur de volontariat a bëgn dla cultura ladina y ince por le clima de colaboraziun tres produtif y positif“, insciö l’assessur por la cultura ladina Florian Mussner.
Cun la fin de ma é la presidënza de Elsa Zardini do da prësc set agn a cé dl’Union Generela di Ladins dla Dolomites jüda a piz. „I á podü conësce Elsa Zardini sciöche na porsona dër engajada, che á dediché tröp de so tëmp y laur al svilup y mantignimënt dla cultura ladina y á dé insciö n contribut important por nosta cultura“, insciö l’assessur por la scora y cultura ladina Florian Mussner. Cun l’impëgn volontar de de plü agn de Elsa Zardini él sté meso da porté inant de plü proiec y scomenciadies tl ciamp cultural tres te n clima de colaboraziun positif, insciö l’assessur Mussner. Ala presidënta nöia, Milva Mussner da Gherdëna che é gnüda litada da püch, ti aoda l’assessur n bun scomenciamënt.
rc
