Atualità
12 de jügn: Convëgn internazional sön Bruno Kreisky a Balsan
Ai 29 de lugio sarál l’aniversar di 25 agn dala mort de Bruno Kreisky. Por chësta ocajiun inviëia le Archif provinzial a n’incuntada de stüde ai 12 de jügn che jará a funz ala relaziun de Bruno Kreisky cun le Südtirol. Tla Ciasa Kolping da Balsan gnarál tigní de plü referac de plü esperc dla storia locala y internazionala. Al sará ince presënc le presidënt Kompatscher y l'assessur Mussner.
Sciöche Secreter de Stat (1953 – 1959) y sciöche Minister di afars por l’ester (1959 – 1966) é Bruno Kreisky sté l'autur politich prinzipal dala pert austriaca por ci che reverda la soluziun dla chestiun südtiroleja danter la Talia y l’Austria. Tres n proiet deboriada danter l’Archif Kreisky da Viena y l’Archif provinzial de Südtirol él gnü inrescí y digitalisé ti ultims agn documënc interessanc che reverda la chestiun dl Südtirol.
En gaujiun dla contlujiun dl proiet y dl aniversar dai 25 agn dala mort de Bruno Kreisky él i dui archifs che á lauré al proiet che inviëia a n Convëgn de stüde internazional „Bruno Kreisky y la chestiun dl Südtirol“
en vëndres, ai 12 de jügn dl 2015
dales 20.00
tla Ciasa Kolping
a Balsan.
Ala manifestaziun sarál presënc de plü esperc de politica y storia locala y da foradecá sciöche ince le presidënt dla Provinzia Arno Kompatscher y le minister austriach da denant di afars cun l’Ester Peter Jankowitsch. La manifestaziun gnará tignida por talian y todësch. Le program é gnü injunté.rc
