Atualità
Ejam de maduranza 2015: Tematiches dla pröma proa scrita
Incö, mercui ai 17 de jügn dl 2015 él gnü tigní la pröma proa scrita dl ejam de maduranza tles scores altes dles valades ladines dl Südtirol. Indöt 77 studënc y studëntes ametüs/des al ejame á podü chirí fora sce ai uro fá la proa por talian o por todësch.
Indöt 77 studënc y studëntes é gnüs/gnüdes ametüs/des do la contlujiun dl ann scolastich 2014/15 al ejam de maduranza dles scores altes tles valades ladines. 10 é i candidac che tól pert al ejame de maduranza dla cuinta classa dl Lizeum da La Ila, 21 studënc y studëntes dla cuinta classa dl Istitut Tecnich Economich da La Ila, 25 é i studënc ametüs al ejam de maduranza dla cuinta classa dl ITE Raetia y 21 dl Lizeum d’Ert Cademia da Urtijëi. Pro la pröma proa scrita, che é gnüda tignida incö (17/06) danmisde á i candidac dles scores ladines podü chirí fora da scrí la proa o por talian o por todësch. Le documënt cun i temesc dla pröma proa scrita é gnü injunté.
La secunda proa scrita reverda na materia caraterisënta de vigni scora y á le fin da valuté les conoscënzes speziches dl studënt y dla studënta. Por chësta proa scrita á le MIUR dé fora por chësc ann n valgönes indicaziuns nöies respet ai atri agn. (Le documënt cun les materies é gnü injunté). La terza proa scrita é partida sö te döes pertes y te dui dis. Le pröm de vëgnel scrit n tema te chël lingaz che ne é nia gnü adoré pro la pröma proa scrita. Le secundo de respogn i candidac a na ligna de domandes che reverda 4 o 5 materies. L’ejam de stat se stlüj jö cun la proa a usc che tol ite dötes les materies de chël ann de scora.
I studënc y les studëntes che fajará chësc ann de scora l’ejam de maduranza sará i pröms che á frecuenté la scora alta aladô dla reforma dl ann 2010.
rc
