Atualità
Scola ladina: renfurzé l dialog - Resultac positifs pra ejams
N bilanz positif possa la Scola ladina mustré su per l ann de scola 2014/2015: Ai ejams de cuntlujion dla scoles mesanes y autes iel unit lascià pro duc i sculeies y duta la sculées y duc à abù suzes. „La Scola ladina tën inant dassënn sun n dialogh partezipatif danter i nsenianc, i sculeies, i genitores y i reprejentanc dla furmazion“, nsci l Assessëur provinziel Florian Mussner.
L Assessëur per la furmazion ladina Mussner à ai 13 de lugio, adum cun si colegs Philipp Achammer y Christian Tommasini sciche cun i ntendënc Peter Höllrigl y Roland Verra y la ntendënta Nicoletta Minnei, fat n ressumé dl ann de scola 2014/2015, che ie iust unit stlut ju.
Mussner à sotrissà che la scola ladina uel purté inant l dialogh partezipatif danter nsenianc, sculeies, genitores y respunsabli, per pudëi svilupé inant la scola ladina y per lascé che la vënie arichida da inputs nueves. Messon dé inant valores, ma nce fé a na moda che nosc jëuni sibe cumpetitifs" nsci Mussner.
"N cont dla rujeneda àn tl ann de scola 2014/2015 scemplificà l badiot scrit", à dit l Assessëur ladin. "La scola ladina à oradechël scumencià a se dé ju a na maniera detalieda cun i media nueves, l travert ie chël de nuzé nce tlo deplù l ladin", à auzà ora l Assessëur. La scola se vëij desfideda de cunlië i media nueves y la furmazion tlassica, scebën che, aldò de Mussner, i libri y l raport di sculeies cun i nesenianc dassëssa inant resté tl zënter.
Dat ju se à i sculeies dla scoles tla valedes ladines tl ann de scola passà ënghe cun la Prima viera mundiela dal pont d'ududa ladin.
A na maniera positiva à Mussner giudicà la cundizions cheder che dà la puscibltà de recunëscer per la valutazion ativiteies sportives y cultureles, che ie iust per na mendranza de mpurtanza.
Tematiches mpurtantes che muessa unì tratedes ie, a dì de Mussner, sce n cajo, n smendrimënt dl'ëures de scola, dantaldut per i plu pitli, na majera continuità tl passé dala scolina ala scola elementera y la ntegrazion de mutons y mutans cun storia de migrazion tla scoles ladines.
"Te uni cajo fova l suzes dla furmazion, sce n ti cëla ai ejams, garantì tla scoles mesanes y autes de Gherdëina y dla Val Badia", à dit cun legrëza l Ntendënt dla scola ladina Verra. Sibe di 258 sculeies dla terza tlasses dla scoles mesanes, sciche nce di 77 sculeies dla scoles autes ie duc unic lascei pro ai ejams de cuntlujion y duc ie passei pra i ejams. Positif ie l bilanz nce per cie che reverda la valutazions. "Pra tramedoi ejams, chëi dla mesanes y chëi dla scoles autes, àl dat ca notes plu autes che ti ani passei", à dit Verra.
La cumpëida de ndut 2561 sculeies y sculées te Gherdëina y tla Val Badia ie resteda plu o manco la medema sciche ti ani dant, à dit l Ntendënt. Nsci à tl ann de scola 2014/2015 de ndut 1268 mutons frecuentà (2013/2014: 1265) la scoles elementeres te Gherdëina y tla Val Badia y 760 mutons(2013/2014: 796) la scoles mesanes. Tla scoles autes de Urtijëi y La Ila ie tl ann de scola passà 561 jëuni jic (2013/2014: 536) a scola.
L assessëur per la scoles tudësces Philipp Achammer à auzà ora che l ie unit arjont n travert mpurtant tla furmazion sudtiroleja: chësta ie la madurtà prufescionela y i ejams de cuntlujion curespundënc, che ie tl ann de scola passà unic tenìi per l prim iede y pra chëi che bën 317 jëunes y jëuni (94 percënt di candidac) ie passei. "Cun la reforma statela dla furmazion se gëura per l Südtirol dantaldut per cie che reverda la despusizions n cont di ejams, che puderà śën unì adatedes y njuntedes dala Provinzia, pusciblteies nueves", nsci Achammer.
"N cont dl plurilinguism àn fat n gran var inant tla scoles talianes", à sotrissà l assessëur per la furmazion taliana Tommasini. "De gran mpurtanza resta l liam danter la scola y l mond dl lëur, ulache messeron fé dut, acioche l vënie crià deplù raporc a na moda che i sculeies sibe njiniei l miec che la va per l daunì", à dit Tommasini.
Video cunferenza stampa:
http://we.tl/yxzJ8MRdY5
Ntervista cun assessëur Florian Mussner
http://we.tl/6RR8DP71Ie
Ntervista cun assessëur Christian Tommasini (talian)
http://we.tl/L4DcfY6oFE
Ntervista cun assessëur Philipp Achammer (tudesch)
http://we.tl/PHV9Ko1e5Y
Mé Audio (MP3) "Achammer, Tommasini, Mussner":
http://we.tl/sOwGnnFX9g
SAN
Galaria dales fotografies
