Atualità
Concurs artistich söl Centená dla Gran Vera: Mostra speziala y davagnadus
Euforia, podëi, impotënza y agonia é i temesc de na mostra speziala che gnará daurida ai 9 d’otober a Balsan, cun chëra che la Repartiziun Cultura ladina presentëia i avenimënc dla Gran Vera y la crudelté dla violënza en general te n’elaboraziun artistica nöia. Indöt gnarál mostré les operes d’ert di ot davagnadus dl concurs artistich da inann, che é gnüs chiris fora da püch.
Por tigní a mënt i avenimënc dla Pröma Vera Mondiala, che á atoché te na manira tragica ince le raiun dles Alpes, y por visualisé les conseguënzes y l’evoluziun dla vera te plü formes artistiches á la Repartiziun Cultura ladina scrit fora, adöm cun la Lia di artisć dl Südtirol, le concurs artistich „1915-2015“. Tó pert á podü düc i artisć dl Südtirol y di Comuns ladins dl Vedl Tirol. „La Repartiziun Cultura ladina ti á dé n gran pëis a chësta scomenciadia, por sostigní i auturs y les auturies te sües creaziuns artistiches, por ti mostré sö ai zitadins les conseguënzes de conflic armá y por sotligné l’importanza de n’Europa unida che tëgn adöm“, á splighé l’assessur por la cultura ladina Florian Mussner che se inconforta ala daurida dla mostra speziala d’otober. Ince l’intendënt dles scores ladines Roland Verra y le diretur dla Repartiziun Cultura ladina Alexander Prinoth é contënc che „le concurs á descedé n gran interes cun tröpes partezipaziuns y creaziuns artistiches desvalies dër de valüta, che desmostra na sbürla dër positiva por le svilup dl’ert te nostes valades.“
Na iuria á ejaminé da püch dötes les 55 propostes dades jö y á chirí fora i davagnadus di pröms ot pesć. Le pröm pest ti é gnü assegné al artist Andreas Zingerle, che á depënt 20 portraits de jornalisć vitimes de vera y che ó insciö sensibilisé sön i conflic armá che despartësc les popolaziuns dl monn dötaurela. Le depenjadú y scoltur Zingerle á 52 agn, al vir y laora a Percha y é nasciü a Porsenú. Cun sües operes d’ert ál davagné de plü pesć, danterater le pest Richard Agreiter por la scoltöra tl 2013. Andreas Zingerle á bele tigní mostres danterater a Berlin, Roma, Minca y Karlsruhe ti Paisc Todësc. N apel ala palsa dles ermes é l’opera d’ert dl secundo classifiché Paul Feichter, che á conzepí n stlop te n spidl. La terza classificada é l’artista Silvia Hell che á svilupé na creaziun da trëi dimenjiuns che visualisëia le spostamënt di confins do l’ann 1915.
Les operes d’ert di trëi davagnadus, sciöche ince dles artistes y di artisć Annemarie Laner, Walter Pancheri, Leander Schwazer, Martina Stuflesser y Letizia Werth gnará presentades te na mostra speziala dai 9 ai 31 d’otober tla Galaria Prisma a Balsan. Cater sará les tematiches zentrales sön chëres che la curadëssa Lisa Trockner svilupará le conzet dla mostra. Euforia, podëi, impotënza y agonia sará insciö i conzec che ti dará na cornisc al punt zentral dla mostra, al’analisa y ala presentaziun dla Pröma Vera Mondiala cënt agn do i avenimënc de scombatimënt.
N aspet important pro l’elaboraziun dles operes d’ert é sté le contrast y la descrepanza danter la orenté y l'euforia da combate tl mëteman dla vera y la realté crödia y les conseguënzes tragiches di avenimënc dla vera, che á porté a desperaziun, crudelté y dolur. Dötes les sorts d’ert á podü tó pert al concurs (pitora, grafica, scoltöra, istalaziun, ert conzetuala, fotografia, video y i.i.).
rc
Galaria dales fotografies
