Atualità
Consëi scolastich provinzial: Edith Ploner é la presidënta nöia
Cun incö al 1 de setëmber é Edith Ploner la presidënta nöia dl Consëi scolastich provinzial y che ará insciö la funziun de coordinaziun dles sentades plenares dl organ de consultaziun dla Junta provinziala sön tematiches che reverda le monn dla scora. Dl Consëi scolastich fejel pert rapresentanc di trëi grups linguistics dl Südtirol.
Le Consëi scolastich provinzial é n organ consultif cun indöt 63 comëmbri: 40 de chisc fej pert dl monn dla scora todëscia, 15 é i rapresentanc dles scores de lingaz talian y 8 dles scores paritetiches ladines. Tles sentades plenares dl Consëi scolastich, che aconsiëia la Junta provinziala, vëgnel tematisé les chestiuns che reverda düc trëi i sistems scolastics provinziai, sciöche por ejëmpl i proiec de leges provinziales nöies, normatives y propostes de mudamënt dl calendar scolastich. Les problematiches che reverda ma un n grup linguistich vëgn analisades tles seziuns aposta.
Le Consëi scolastich é insciö le punt de racoiüda de chi che laora y stüdia al’intern dl monn scolastich dl Südtirol, dai rapresentanc politics y istituzionai cina ales comunités teritoriales y economiches de referimënt. Dl organ de consultaziun fejel pert i trëi assessurs, i intendënc, l’intendënta, mëmbri litá y nominá dala Junta provinziala. La presidënza dl Consëi scolastich vëgn assegnada a rodaziun danter i trëi grups linguistics. Insciö ti spetél sëgn, do Franz Tutzer, rapresentant dla scora todëscia, che é sté a cé dl organ por un n ann y mez y do Bruno Iob, rapresentant dla scora taliana, che á albü l’inciaria de presidënt por 18 mëisc, la presidënza al grup linguistich ladin cun Edith Ploner che surantolará l’inciaria por i proscims 12 mëisc. Edith Ploner é l’ispeturia dles scolines ladines dla Val Badia y de Gherdëna.
rc
