Atualità
Daurida dl ann scolastich nü dles scores de musiga
Cun na conferënza pedagogica á metü man incö al 1 de setëmber l’ann scolastich 2015/16 dles scores de musiga. I assessurs por la scora Florian Mussner y Philipp Achammer á inaudé la sajiun musicala nöia adöm cun le diretur de Departimënt Peter Höllrigl y la direturia provinziala dles scores de musiga Irene Vieder tla sënta dla scora profescionala por l’agricoltöra a Auer.
Presënc ala manifestaziun de inauguraziun ofiziala dl ann scolastich nü dles scores de musiga, che cumpeda dötadöm 16.000 scolares y scolars, incö al 1 de setëmber a Auer é stá i assessurs Florian Mussner y Philipp Achammer, l’intendënt dles scores todësces Peter Höllrigl y la direturia provinziala dles scores de musiga Irene Vieder. Al á tut pert ince na rapresentanza de direturs dles scores de musiga ladines y todësces de döta la Provinzia.
L’assessur Florian Mussner á sotligné l’importanza dles scores de musiga por döta la sozieté dl Südtirol. „La formaziun musicala é na componënta fondamentala por n’istruziun globala“, insciö l’assessur Mussner che á recordé che indöt él scrit ite 900 scolares y scolars ladins tles scores de musiga y che chësc numer confermëia dër na buna partezipaziun dl grup linguistich ladin en confrunt al numer complessif di studënc. L’assessur por la scora ladina á sotligné inant che les scores de musiga ladines dess inant resté coliades ales scores de musiga todësces. „Chësta uniun á desmostré de funzioné bun y na colaboraziun strënta é n fatur de sconanza important por le svilup dles mendranzes“, insciö Mussner che á rengrazié la direturia Vieder por süa porta tres daverta ales ghiranzes dl grup linguistich ladin.
„Les scores de musiga dla Provinzia á na funziun fondamentala por le svilup di mituns y jogn“, chëstes les parores de salüd dl’assessur provinzial Philipp Achammer che á ajunté che „l’obietif prinzipal dl insegnamënt ne dess nia ester la prestaziun individuala, mo le svilup dla segurëza de se instësc y dla confidënza ti atri musizisć.“ L’assessur Achammer á segnalé inant che al é plü listes de speta por podëi tó pert ai cursc por imparé da cianté o da soné n stromënt. „Öna dles sfidades prinzipales di proscims agn sará insciö da redefiní le sistem atual, ince deache l’azetanza d’oblianza nöia dles ores de musiga portará a na ghiranza ajuntiva por les scores de musiga.“ N’atra chestiun importanta reverda la reforma statala tres chëra che la competënza dla formaziun di insegnanc de musiga passará ala Provinzia, insciö Achammer.
L’intendënt por les scores todësces Peter Höllrigl á sotligné te so discurs che les scores de musiga, che fej pert da trëi agn dl Departimënt dla formaziun todëscia, é stades bunes da ciafé n’identité süa y che ares contribuësc te na manira positiva al svilup dl sistem de formaziun südtirolej. N rengraziamënt spezial ti é gnü fat da pert di assessurs Achammer y Mussner ala direturia provinziala Irene Vieder, che jará tosc en ponsiun, y a düc i maestri y dötes les maestres de musiga por n ann de musiga cun tröc suzesc y esperiënzes plajores.
rc
Galaria dales fotografies
Foto: OSP/Me
