Atualità
Biblioteca Teßmann: Sciöche i geniturs pó sostigní le lingaz de sü mituns
Co pó pa i geniturs sostigní le svilup dl lingaz di mituns? A chësta domanda ti jará dui esperc dl setur a funz tratan n referat organisé dla Biblioteca provinziala Teßmann, adöm cun l’Ofize linguistich dl Istitut cultural dl Südtirol, ai 30 de setëmber a Balsan. La sëra d'informaziun é n'ocajiun ince por geniturs por s'informé sön la tematica dl'educaziun linguistica dles mitans y di mituns.
Al é na morvëia sciöche n möt impara n lingaz. Mo nia dagnara ne vá döt bun. Ci mësson pa fá sce i geniturs, le dotur di mituns o la scolina s’intënn che n möt ne baia nia sciöche al alda. Vál döt apost dassu cun le tëmp? Adora le möt aiüt spezialisé? Co pó pa i geniturs sostigní le svilup dl lingaz dl möt?
Margit Jäcklein y Reinhard Dümler conësc sciöche pedagogs curatifs (dl lingaz) y auturs bun chëstes domandes. Te süa presentaziun mostrarái sciöche le lingaz se svilupëia, de ci che an mëss se cruzié y sciöche an pó se sconé. I referënc dá consëis sciöche i geniturs pó influenzé le svilup dl lingaz de n möt – y chël dala nasciüda inant.
Le referat "Co pó pa i geniturs sostigní le svilup dl lingaz de sü mituns" gnará tigní en mercui, ai 30 de setëmber, dales 20.00 inant tla Bilblioteca Teßmann.
Chësta scomenciadia vëgn organisada dala Biblioteca Provinziala Dr. Friedrich Teßmann y dal’Ofize linguistich dl Istitut cultural dl Südtirol. Por plü informaziuns: telefon 0471 471814, e-Mail: info@tessmann.it; http://www.tessmann.it/la/home.html
rc
Galaria dales fotografies
