Atualità
S(ch)ein: Les ambries dla musiga ai 03 de otober a Franzensfest
Chësta sabeda, ai 3 de otober dl 2015 dales 20.30, gnarál presenté al Fort de Franzensfest na manifestaziun musicala speziala dal titul „S(ch)ein: Les ambries dla musiga“ cofinanziada dala Repartiziun cultura dl’Intendënza ladina. L’evënt é na manifestaziun combinada danter istalaziuns artistiches y musicales dal baroch cina aldedaincö.
Istalaziuns cun füch, ambries y sons fajará da acompagnamënt ai vijitadus cina le salf dl conzert por cherié n’atmosfera danter realté y finziun. Le partezipant instëss sará na pert ativa dl’istalaziun culturala: les löms y ambries se moscedará cun i sons che acompagnará i vijitadus tratan le conzert sön n percurs de reflesciun cun tl zënter le conzet prinzipal dl evënt, la relaziun danter l’ester y la finziun. Le conzert gnará soné dal ensemble „SonnAiér“, de chël che al fej pert plü artisć ladins spezialisá tl’esecuziun de musiga da plüdadi. I artisć é Priska Comploi, Nathan Chizzali, Esther Crazzolara, Katharina Egger, Johannes Heim y Vittorio Zanon. Le program prevëiga l’esecuziun de plü operes de A. Vivaldi, G.F. Händel y de J.C. Graupner sön stormënc storics dl tëmp baroch.
Les istalaziuns artistiches é gnüdes realisades da n grup de artisć internazionai cun l’obietif da ti trasmët al vijitadú na lerch de reflesciun sön le tëmp passé cun sons da aldí y scultöres da odëi.
Le conzert „S(ch)ein: Les ambries dla musiga“ gnará tigní en sabeda, ai 3 de otober dl 2015, dales 20.30 inant, tl Fort de Franzensfest. Por informaziuns y prenotaziuns prëibel vijité la plata internet: http://www.sein-schein.com/
rc
Galaria dales fotografies
