Atualità
Laur por y cun la jonëza: Modalités nöies por le sostëgn dles ativités
I criters por la conzesciun di contribuc por le sostëgn dles ativités de laur por y cun la jonëza di grups linguistics todësch y ladin é gnüs aprová incö, mertesc ai 20 d’otober, dala Junta provinziala sön proposta dl assessur Philipp Achammer. Le percurs burocratich é gnü scemplifiché, le paiamënt antizipé sará majer.
L’Ofize Laur por y cun la jonëza dla Provinzia á adaté i criters de sostëgn dles organisaziuns y uniuns che laora ti seturs dla jonëza di grups linguistics ladin y todësch y che fej domanda de contribuc. I criters nüs é gnüs aprová incö, mertesc ai 20 d’otober, dala Junta provinziala. Al é döes de majeres novités che reverda le percurs dla conzesciun di contribuc y le paiamënt antizipé. Cun l’ann 2016 messará les domandes de contribuc gní dades jö cina ai 10 de novëmber dl ann da denant. Do l’azetaziun dl bilanz de previjiun podará la soma dl contribut gní stabilida avisa cun n decret. Tres chësc decret sarál ince poscibl da paié fora n’antizipaziun dl 80 porcënt dl contribut efetif. Insciö tomel demez n vare burocratich, aladô de chël che al gnô naota paié fora le 50 porcënt dl contribut y spo do la definiziun avisa dl contribut le 70 porcënt. „Cun chësc vare ne sarál nia ma poscibl da alisiré les uniuns y organisaziuns che damana do contribuc ordinars, por proiet y integratifs de n pëis burocratich, mo ares ará ince plü segurëza finanziara“, insciö l’assessur competënt Philipp Achammer.
rc
