Atualità
Dala Junta: 15,2 miliuns implü por l’Université Lëdia da Balsan
La Junta provinziala á aprové incö (ai 3 de novëmber) la secunda pert dl finanziamënt 2015 por l’Université Lëdia da Balsan. La Provinzia mët a desposiziun 15,2 miliuns de euro por l’ativité dl ënt de formaziun y ti conzed, danterater, da manajé inant la Biblioteca medejinala virtuala.
La convenziun programatica-finanziara danter la Provinzia y l’Université, á recordé incö (ai 03/11) le presidënt Arno Kompatscher, prevëiga n finanziamënt da pert dla Provinzia de 60 miliuns de euro por l’ann 2015. Le pröma pert dla soma é bele gnü aprovada dala Junta tl mëis de jügn, incö él gnü assegné ciamó indöt 15,2 miliuns de euro.
La convenziun programatica- finanziara ti conzed al’Université, danterater, da surandé l’ampliamënt di sorvisc che reverda i seturs dl’informatica, dla biblioteca y dla linguistica-didatica ince a d’atri ënc publics tl Südtirol, a sozietés controlades dala Provinzia y a istituziuns d’inrescida y de formaziun locala. La secunda pert dl finanziamënt aprovada incö ti conzed al’Université da Balsan da garantí, danterater, i sorvisc por la gestiun dl proiet Biblioteca virtuala.
La Provinzia á les competënzes de legislaziun por ci che reverda i seturs dl finanziamënt dles ativités y dl frabiché dla Université Lëdia da Balsan, sciöche ince la competënza sön le control aministratif. La suravijiun sön l’ativité academica dl’Université y sön le laur d’inrescida scientifica y tecnologica ne ti speta nia ala Provinzia mo al Minister dl’Université.
rc
