Atualità
L’ann de vera 1915: Convëgn de dui dis tla biblioteca Teßmann
L’entrada te vera dla Talia y les situaziuns de vera sön le front é les tematiches dl convëgn dediché al “Ann de vera 1915” che pëia ia en jöbia ai 12 (cun na mësa torona) y che vá inant en vëndres ai 13/11 (cun referac). Le convëgn é organisé dala Teßmann y dal’Academia austriaca dles Sciënzes adöm cun le Zënter de competënza regionala dla LUB y l’Istitut storich talian-todësch de Trënt.
I laurs de aprofondimënt sön l’ann de vera 1915 se deura en jöbia ai 12 de novëmber dales 20.00 tla sënta dla bibliotea Teßmann a Balsan (strada Diaz 8) cun na mësa torona dal titul “Der König von Italien hat mir den Krieg erklärt” (le re dla Talia me á detlaré vera). Holger Afflerbach y Paolo Pombeni trata la tematica cun Brigitte Mazohl y analisëia da plü daimpró l’intervënt talian dal punt de odüda di Paisc Todësc, dl’Austria y dla Talia. Brigitte Mazohl é la coordinadëssa dl Istitut de storia y etnologia europeica dl’Université de Desproch y presidënta dla tlassa de storia y filosofia dl’Academia austriaca dles Sciënzes, Holger Afflerbach é professur y Chair of Central European History dl’Université de Leeds y Paolo Pombeni é le diretur dl Istitut storich talian-todësch dla Fondaziun Bruno Kessler da Trënt.
En vëndres, ai 13 de novëmber dl 2015, dales 09.00 ales 13.00 él sön le program i referac de Andreas Gottsmann (dales 09.15), diretur dl Istitut storich austriach a Roma (“Der italienische Kriegseintritt im Mai 1915. Zur Chronologie einer vorhersehbaren Katastrophe“), de Stefan Wedrac (dales 10.00), colaboradú dl Istitut de inrescida dl’eté moderna y dla storia contemporanea dl’Academia austriaca dles Sciënzes (“Die Unruhen in Triest am Tag der italienischen Kriegserklärung“), de Matthias Egger (dales 11.00), doctorant dl Istitut de storia y etnologia europeica dl‘Université Leopold-Franzens a Desproch (“Den österreichisch-ungarischen Offizieren ist auf jede Weiße fühlbar zu machen, das sie besiegte Feinde sind […]“ Kriegsgefangenschaft in Italien 1915-1919 aus österreichisch-ungarischer Perspektive“) y de Maurizio Cau (dales 11.30), colaboradú dl Istitut storich talian-todësch dla Fondaziun Bruno Kessler a Trënt (“Le conseguenze dell'Intervento nel contesto politico-identitario trentino e il peso dell'esperienza bellica nell'evoluzione della coscienza politica degasperiana”).
La manifestaziun vëgn organisada dala Biblioteca Provinziala Dr. Friedrich Teßmann y dal’Academia austriaca dles Sciënzes, en colaboraziun cun le Zënter de competenza Storia regionala dl‘Université Lëdia de Balsan y l’Istitut storich talian-todësch de Trënt. Por informaziuns plü monüdes: info@tessmann.it, www.tessmann.it/
rc
