Atualità
Sentada dles trëi Consultes di jogn: Conzec y idees por le dagní
Les trëi Consultes provinziales di jogn de düc i trëi grups linguistics s’á incunté en sabeda ai 7 de novëmber por na sentada deboriada. L’incuntada é gnüda a se le dé por inrescí les poscibilités de colaboraziun sot al moto "Gemeinsam Projekt Südtirol - la mia Heimat - cun deplu rujenedes y cultures".
Vigni ann s’incunta les trëi Consultes provinziales di jogn di grups linguistics ladin, todësch y talian por fá n’analisa deboriada sön la realisaziun di proiec y por ciaré sön co renforzé la colaboraziun tl dagní. Na chestiun zentrala dl’incuntada da chësc ann, gnüda a se le dé ai 7 de novëmber a Porsenú, é stada le svilup dl conzet de patria ince sot al punt de odüda dla convivënza de plü cultures y lingac te Südtirol. Do n’introduziun informativa da pert dla direturia dl’Astat, Johanna Plasinger, sön tematiches desvalies che reverda le plurilinguism tl Südtirol, la presënza internet dles Consultes por i jogn, la colaboraziun danter les scores y l’Ofize por y cun la jonëza, le volontariat y la discusciun atuala sön l’integraziun de migranc á i rapresentanc dles consultes albü la poscibilité da porté dant tematiches che i stá dër a cör. N punt zentral dl’incuntada é sté le dejider da porvé da lauré deplü adöm, dantadöt ti seturs che reverda düc trëi i grups de lingaz, por intergní cun na usc plü sterscia te debatüdes politiches, culturales y soziales.
Do che vigni rapresentant á podü porté dant sü pinsiers che é spo ince gnüs analisá tl grup é la sentada gnüda stlüta jö cun na discusciun finala, a chëra che al á ince tut pert l’assessur por la scora todëscia Philipp Achammer. Les ghiranzes plü importantes ti gnará tosc portades dant ala Junta provinziala, che ará le compit da les analisé por ciaré sce al é poscibl da les realisé.
rc
Galaria dales fotografies
